പട്ടിക്കാട്: ദേശീയപാത ചുവന്നമണ്ണ് പത്താംകല്ലില് ഉണ്ടായ വാഹനാപകടത്തില് ഒമ്പതു വയസുകാരന് മരിച്ചു. കണ്ണാറ പുത്തന്വീട്ടില് അനീഷിന്റെയും കുഞ്ഞുദേവിയുടെയും മകന് അനഞ്ജയ് കൃഷ്ണ ആണ് മരിച്ചത്. അനീഷിന്റെ സഹോദരന് ഷിനു (32) ഗുരുതര പരിക്കുകളോടെ തൃശൂര് മെഡിക്കല് കോളേജ് ആശുപത്രിയില് ചികിത്സയിലാണ്. ഇന്നലെ ഉച്ചയ്ക്ക് 12.15നായിരുന്നു അപകടം. പത്താംകല്ലില് ബിവറേജസ് ഷോപ്പിനു മുന്നില് നിര്ത്തിയിട്ടിരുന്ന ലോറിക്കു പിറകില് ഇവര് സഞ്ചരിച്ചിരുന്ന സ്കൂട്ടര് ഇടിച്ചാണ് അപകടം ഉണ്ടായത്.
പാലക്കാട് ഭാഗത്തേക്കുള്ള പാതയിലൂടെ പോവുകയായിരുന്നു ഇവര്. ഇന്നലെ വൈകീട്ടോടെയാണ് അനഞ്ജയ് മരിച്ചത്. കണ്ണാറ അപ്പര് പ്രൈമറി സ്കൂള് നാലാം ക്ലാസ് വിദ്യാര്ഥിയാണ്. സഹോദരി: അനഞ്ജിക കൃഷ്ണ. പത്താംകല്ലില് ബീവറേജസ് ഷോപ്പിനു സമീപം ദേശീയപാതയിലെ അനധികൃത പാര്ക്കിംഗിനെതിരെ നിരവധി പരാതികള് ഉയര്ന്നു വന്നിട്ടുള്ളതാണ്. മദ്യം വാങ്ങാന് എത്തുന്നവര് ദേശീയപാതയില് തന്നെയാണ് വാഹനം നിര്ത്തിയിടുന്നത്. മുന്പും നിരവധി അപകടങ്ങള് ഇവിടെ നടന്നിട്ടുണ്ട്. എന്നാല് ഇതിനൊരു ശാശ്വത പരിഹാരം കാണാന് അധികൃതര്ക്ക് ഇതുവരെ കഴിഞ്ഞിട്ടില്ല.