ആലപ്പുഴ: ജില്ലയിലെ നഗരസഭയിലും അനധികൃത കെട്ടിടങ്ങള്ക്ക് നമ്പർ നല്കിയതായി കണ്ടെത്തല്. കഴിഞ്ഞ യുഡിഎഫ് ഭരണസമിതിയുടെ കാലത്ത് റവന്യൂ സൂപ്രണ്ടിന്റെ വ്യാജ ഒപ്പും സീലും ഉപയോഗിച്ചാണ് ഇത്തരത്തില് നമ്പർ നല്കിയത്. സംഭവത്തില് പോലീസ്, റവന്യൂ വകുപ്പുകളുടെ സംയുക്ത അന്വേഷണം ആരംഭിച്ചു. പ്രത്യേക അന്വേഷണം ആവശ്യപ്പെട്ട് ആലപ്പുഴ ജില്ലാ പോലീസ് മേധാവിക്ക് നഗരസഭാ സെക്രട്ടറി പരാതി നല്കിയിട്ടുണ്ട്.
ആലപ്പുഴ നഗരസഭയിലെ മുല്ലക്കല് വാര്ഡിലുള്ള 6 കടകള്ക്കാണ് നമ്പർ നല്കിയിരിക്കുന്നത്. കെട്ടിട ഉടമസ്ഥര് ഉദ്യോഗസ്ഥരുടെ സഹായത്തോടെ തപാല് വിഭാഗത്തില് നിന്ന് ഒരപേക്ഷയുടെ നമ്പർ ആദ്യം സംഘടിപ്പിക്കുന്നു. പിന്നീട് ഈ നമ്പർ ഉപയോഗിച്ച് പുതിയ ഫയലുണ്ടാക്കി റവന്യൂ വകുപ്പില് എത്തിക്കുകയും നികുതി അടക്കുകയും ചെയ്യുന്നതാണ് തട്ടിപ്പ് രീതി. റവന്യൂ സൂപ്രണ്ട് അസസ്മെന്റ് രജിസ്റ്റര് പരിശോധിച്ചതോടെയാണ് തട്ടിപ്പ് പുറത്തായത്. സംഭവത്തില് വിശദമായ അന്വേഷണം പുരോഗമിക്കുകയാണ്.
