തിരുവനന്തപുരം : സ്വകാര്യ ബസുകളെ ലോക്ക്ഡൗണ് കാലത്തെ അധിക ചാര്ജ് ഈടാക്കാന് അനുവദിച്ചുകൊണ്ടുള്ള ഉത്തരവിനെതിരെ സര്ക്കാര് അപ്പീല് നല്കും. ബുധനാഴ്ച തന്നെ കോടതിയില് അപ്പീല് നല്കുമെന്ന് ഗതാഗതമന്ത്രി എ.കെ ശശീന്ദ്രന് അറിയിച്ചു. ഇതിനുവേണ്ടി അഭിഭാഷകരോട് ആവശ്യപ്പെട്ടതായി അദ്ദേഹം പറഞ്ഞു. കോടതി ഉത്തരവ് ഇതുവരെ സര്ക്കാരിന് ലഭിച്ചിട്ടില്ല. ഇത് ലഭിക്കുന്നതുവരെ സര്ക്കാരിന് സാവകാശമുണ്ട്. എന്നാല് ബുധനാഴ്ച രാവിലെ തന്നെ കോടതിയെ കാര്യങ്ങള് ബോധിപ്പിക്കാന് അഭിഭാഷകരോട് ആവശ്യപ്പെട്ടിട്ടുണ്ടെന്നും മന്ത്രി പറഞ്ഞു.
ലോക്ഡൗണ് കാലത്ത് താത്കാലികമായി വര്ധിപ്പിച്ചിരുന്ന ബസ് ചാര്ജ് കുറച്ച സര്ക്കാര് നടപടി ഹൈക്കോടതി സ്റ്റേ ചെയ്യുകയായിരുന്നു. സ്വകാര്യ ബസ് ഉടമകളുടെ ഹര്ജിയിലായിരുന്നു കോടതി നടപടി. സ്വകാര്യ ബസുകള്ക്കും കെഎസ്ആര്ടിസിക്കും അധിക നിരക്ക് ഈടാക്കാമെന്നും കോടതി ഉത്തരവിട്ടു. കോ വിഡ് കാലത്തെ കനത്ത സാമ്പത്തിക നഷ്ടം ചൂണ്ടിക്കാട്ടിയാണ് ബസുടമകള് ഹൈക്കോടതിയെ സമീപിച്ചത്.
അധിക ചാര്ജ് ഈടാക്കി സര്വീസ് നടത്തുമ്പോള് ബസുകള് കോവിഡ് മാനദണ്ഡങ്ങള് കൃത്യമായി പാലിക്കണമെന്നും കോടതി നിര്ദേശിച്ചു. സര്ക്കാര് പുതിയ ഉത്തരവ് ഇറക്കുന്നതുവരെയാണ് സ്റ്റേ നിലനില്ക്കുക. ലോക്ക് ഡൗണിനെ തുടര്ന്ന് മേഖലയിലുണ്ടായ സാമ്പത്തിക നഷ്ടം നികത്താനാണ് താത്കാലികമായി ബസ് ചാര്ജ് കൂട്ടിയത്. പിന്നീട് ഇളവുകള് വന്നതോടെയാണ് സര്ക്കാര് ഉത്തരവ് പിന്വലിച്ചത്.
