പത്തനംതിട്ട : തകര്‍ന്ന് താറുമാറായ സ്വകാര്യ ബസ് മേഖലയെ സംരക്ഷിക്കുന്നതിന് സര്‍ക്കാര്‍ അടിയന്തിര നടപടി സ്വീകരിക്കണമെന്നാവശ്യപ്പെട്ട് കേരളത്തിലെ സ്വകാര്യ ബസ്സുടമകള്‍ ഇന്ന് ഉപവാസ സമരം നടത്തുകയാണ്. സംസ്ഥാനത്തുടനീളം ജില്ല, താലൂക്ക് കേന്ദ്രങ്ങളിലെ ബസ്സ്റ്റാന്‍ഡുകളില്‍ രാവിലെ 10 മണിക്ക് ആരംഭിച്ച സമരം വൈകിട്ട് അഞ്ചുമണിക്ക് അവസാനിക്കും. കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഫെഡറേഷന്റെ നേതൃത്വത്തിലാണ് ഉപവാസ സമരം.
2020ല്‍ 66 രൂപ വിലയുണ്ടായിരുന്ന ഡീസലിന് ഇന്ന് 31രൂപ വര്‍ധിച്ചു. അതോടൊപ്പം ടയര്‍, സ്പെയര്‍ പാര്‍ട്സ്, ഓയില്‍ മുതലായവക്കും വലിയ വര്‍ധന ഉണ്ടായിരിക്കുകയാണ്. കോവിഡ് മൂലമുണ്ടായ ലോക്ഡൗണിന് ശേഷം ബസുകളില്‍ യാത്രക്കാര്‍ കുറഞ്ഞതും കൂടുതല്‍ നിയന്ത്രണങ്ങള്‍ ഏര്‍പ്പെടുത്തിയതും തിരിച്ചടിയായി.
തെരഞ്ഞെടുപ്പിന് മുമ്പ് കഴിഞ്ഞവര്‍ഷം മൂന്ന് ക്വാര്‍ട്ടറിലെ റോഡ് നികുതി ഒഴിവാക്കി നല്‍കിയതൊഴിച്ചാല്‍ ഒരുവിധ ആനുകൂല്യങ്ങളും സര്‍ക്കാര്‍ ഈ മേഖലക്ക് നല്‍കിയിട്ടില്ല. എന്നാല്‍, കോവിഡിന്റെ രണ്ടാം തരംഗത്തെത്തുടര്‍ന്നുണ്ടായ ലോക്ഡൗണിനുശേഷം നികുതിപോലും ഒഴിവാക്കാതെ അടക്കാനുള്ള സാവകാശം നീട്ടിനല്‍കുക മാത്രമാണ് ചെയ്തിട്ടുള്ളത്.
കഴിഞ്ഞ അഞ്ചുവര്‍ഷം കൊണ്ട് 5000 കെ.എസ്.ആര്‍.ടി.സി ബസുകള്‍ക്ക് 6000കോടി രൂപയാണ് സര്‍ക്കാര്‍ ചെലവഴിച്ചിട്ടുള്ളത്. കോവിഡിന് മുമ്പ് 12,500 സ്വകാര്യ ബസുകള്‍ ഉണ്ടായിരുന്ന സംസ്ഥാനത്ത് ഇപ്പോള്‍ 1000ല്‍പരം ബസുകള്‍ മാത്രമാണ് സര്‍വിസ് നടത്തുന്നത്. ബാക്കി വരുന്ന 10000ല്‍ അധികം ബസുകള്‍ ഇന്നും നിരത്തിലിറക്കാന്‍ സാധിക്കാത്തവിധത്തില്‍ കട്ടപ്പുറത്താണ്. ഈ ബസുകള്‍ നിരത്തിലിറങ്ങുന്നതിനുതന്നെ ബസൊന്നിന് മൂന്നുലക്ഷം രൂപയോളം ചെലവ് വരും. മോട്ടോര്‍ തൊഴിലാളി ക്ഷേമനിധി ബോര്‍ഡില്‍ ബസുടമകള്‍ അടച്ചിട്ടുള്ള 1000 കോടിയിലധികം രൂപയുണ്ട്. ഈ ഫണ്ടില്‍നിന്ന് പലിശരഹിത വായ്പ നല്‍കണമെന്ന് ആവശ്യപ്പെട്ടിട്ടും നടപടി ഉണ്ടായിട്ടില്ല.
യാത്രാനിരക്ക് വര്‍ധനക്കായി സര്‍ക്കാര്‍ നിയോഗിച്ചിട്ടുള്ള ജസ്റ്റിസ് രാമചന്ദ്രന്‍ കമ്മീഷന്‍ കഴിഞ്ഞവര്‍ഷം റിപ്പോര്‍ട്ട് നല്‍കിയിട്ടും ഇതേവരെ അതില്‍ ഒരു നടപടിയും ഉണ്ടായിട്ടില്ല. ചെലവിന് ആനുപാതികമായി വിദ്യാര്‍ഥികളുടേതടക്കമുള്ള ബസ് ചാര്‍ജ് വര്‍ധിപ്പിക്കുന്നതിനും കോവിഡ് കാലം കഴിയുന്നതുവരെ ബസുകളുടെ റോഡ് നികുതി ഒഴിവാക്കുന്നതിനും റിപ്പോര്‍ട്ട് ശുപാര്‍ശ ചെയ്യുന്നു. ഇപ്പോള്‍ നിരത്തിലോടുന്ന ബസുകളില്‍ മിക്കതിനും ഡീസലടിക്കാന്‍ പണമില്ലാതെയും ശമ്പളംപോലും ജീവനക്കാര്‍ക്ക് കൊടുക്കാനാകാത്ത സ്ഥിതിയുമാണുള്ളത്. 140 കിലോമീറ്ററിലധികം ദൂരത്തില്‍ ഓടുന്ന സ്വകാര്യ ബസുകളുടെ പെര്‍മിറ്റുകള്‍ പുതുക്കി നല്‍കാതെയുള്ള അവസ്ഥയും നിലനില്‍ക്കുന്നു.
സര്‍ക്കാരിന്റെ ഈ നിഷേധാത്മക സമീപനം കാരണമാണ് ഒരു ബസുടമക്ക് ജീവനൊടുക്കേണ്ടിവന്നത്. അതോടൊപ്പം തന്നെ തൊഴില്‍ നഷ്ടപ്പെട്ട നിരവധി തൊഴിലാളികള്‍ ദാരിദ്ര്യത്തിലും പട്ടിണിയിലുമായി കഴിയുന്നു. ഉപവാസ സമരത്തിന്റെ ഭാഗമായി പത്തനംതിട്ട, റാന്നി ഇട്ടിയപ്പാറ, മല്ലപ്പള്ളി, തിരുവല്ല ,പന്തളം എന്നീ സ്വകാര്യ ബസ് സ്റ്റാന്‍ഡുകളിലും , അടൂര്‍ കെ.എസ്.ആര്‍.ടി.സി ബസ് സ്റ്റാന്‍ഡിനു സമീപവും ഉപവാസ സമരം നടക്കുകയാണെന്ന് പ്രൈവറ്റ് ബസ് ഓപ്പറേറ്റേഴ്സ് അസോസിയേഷന്‍ ഭാരവാഹികള്‍ പറഞ്ഞു.
