റിലയൻസ് ജിയോയ്ക്ക് 2024 സാമ്പത്തിക വർഷത്തിലെ ആദ്യ പാദത്തിൽ ലാഭത്തിൽ 12.2 ശതമാനം വർധന. ഏപ്രിൽ- ജൂൺ പാദത്തിൽ 4,863 കോടി രൂപയുടെ ലാഭമാണ് കമ്പനി നേടിയത്.റിലയൻസ് ഇൻഡസ്ട്രീസിൻെറ ടെലികോം വിഭാഗമാണ് ജിയോ. കഴിഞ്ഞ വർഷം ഇതേ കാലയളവിൽ റിലയൻസ് ജിയോ 4,335 കോടി രൂപ അറ്റാദായം നേടിയിരുന്നു. ഈ പാദത്തിൽ റിലയൻസ് ജിയോയുടെ മൊത്തം വരുമാനം 24,127 കോടി രൂപയായി ഉയർന്നു.. ഒരു വർഷം മുമ്പ് 21,995 കോടി രൂപയിരുന്നു ഇത്. പ്രവർത്തനങ്ങളിൽ നിന്നുള്ള വരുമാനം 2022 ജൂൺ പാദത്തിലെ 21,873 കോടി രൂപയിൽ നിന്ന് 9.9 ശതമാനം വർധിച്ച് 24,042 കോടി രൂപയായി.
ഓരോ ഉപയോക്താവിൽ നിന്നുമുള്ള ശരാശരി വരുമാനം 2.8 ശതമാനം വർധിച്ച് 180.5 രൂപയായി ഉയർന്നു. ടെലികോം ഓപ്പറേറ്റർ ഈ പാദത്തിൽ 92 ലക്ഷം വരിക്കാരെ ചേർത്തു, മൊത്തം വരിക്കാരുടെ എണ്ണം 44.8 കോടിയായി. ഈ പാദത്തിൽ പ്രതിമാസ ചെലവ് 1.8 ശതനമാനം കുറഞ്ഞു.ജൂൺ പാദത്തിൽ ജിയോയുടെ ലാഭം 250 ബേസിസ് പോയിൻറുകൾ ഉയർന്നു. കമ്പനിയുടെ ഈ പാദത്തിലെ മൊത്തം ചെലവ് ഒരു 17,594 കോടി രൂപയായി ഉയർന്നു. ഒരു വർഷം മുമ്പത്തെ 16,136 കോടി രൂപയിൽ നിന്നാണ് തുക ഉയർന്നത്. മൊത്തം നെറ്റ്‌വർക്ക് പ്രവർത്തന ചെലവ് ഒരു വർഷം മുമ്പത്തെ 6,842 കോടി രൂപയിൽ നിന്ന് 7,379 കോടി രൂപയായി ഉയർന്നതാണ് ചെലവ് ഉയരാൻ കാരണമായത്. വയർലൈൻ സേവനങ്ങളിലുൾപ്പെടെയുള്ള വരിക്കാരുടെ വളർച്ച ബിസിനസിലെ വരുമാനത്തിലേക്ക് നയിച്ചു. വീഡിയോ ബ്രോഡ്‌കാസ്റ്റ്, ക്ലൗഡ് സൊല്യൂഷനുകൾ എന്നിവ പോലുള്ള പുതിയ സേവനങ്ങൾക്കൊപ്പം ഡിജിറ്റൽ സേവന പ്ലാറ്റ്‌ഫോമിലെ വളർച്ചയും കമ്പനിയുടെ ഏകീകൃത വരുമാന വളർച്ചയ്ക്ക് കാരണമായി.
5ജി വ്യാപിപ്പിക്കും
2023 ഡിസംബറിന് ഇന്ത്യയിൽ ഉടനീളം 5ജി എത്തിക്കൻ ജിയോ ലക്ഷ്യമിടുന്നുണ്ട്. ജിയോ വരും വർഷങ്ങളിൽ കണക്റ്റിവിറ്റിയിലും ഡിജിറ്റൽ പ്ലാറ്റ്‌ഫോമുകളിലും കൂടുതൽ വളർച്ചയും വേഗതയും നേടുമെന്ന് റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി പറഞ്ഞു. ഇതേ പാദത്തിൽ റിലയൻസിൻെറ ഡാറ്റാ ഉപയോഗത്തിൽ 28.3 ശതമാനമാണ്. വാർഷിക വളർച്ച 90 ശതമാനം മുൻനിര നഗരങ്ങളിൽ 1.15 ലക്ഷം 5ജി സൈറ്റുകൾ വിന്യസിച്ചിട്ടുണ്ടെന്ന് മുകേഷ് അംബാനി വ്യക്തമാക്കി. നെറ്റ്‌വർക്ക് ലഭ്യതയിലും ഉപഭോക്തൃ അനുഭവത്തിലും ജിയോ മുന്നിലാണെന്നും അദ്ദേഹം പറയുന്നു.
