കോഴിക്കോട് : കാറില്‍ കഞ്ചാവ് കടത്താന്‍ ശ്രമം ദമ്പതികള്‍ അടക്കം മൂന്ന് പേര്‍ പിടിയില്‍. കാര്‍ അപകടത്തില്‍ പെട്ടതോടെയാണ് പ്രതികള്‍ പിടിയിലായത്. നല്ലളം സ്വദേശികളായ അരീക്കാട് ഹസന്‍ഭായ് വില്ലയില്‍ പി.എം ഷംജാദ് (25) ഭാര്യ അനീഷ (23), പുല്ലാനിപറമ്പ് ബൈത്തുല്‍ ഹലയില്‍ ബിഎം അഹമ്മദ് നിഹാല്‍ (26) എന്നിവരെയാണ് മെഡിക്കല്‍ കോളേജ് പോലീസ് പിടികൂടിയത്.
പോലീസ് പിന്തുടരുന്നതിനിടെയാണ് മെഡിക്കല്‍ കോളേജ് പരിസരത്ത് വെച്ച്‌ കാര്‍ അപകടത്തില്‍പ്പെട്ടത്. കെ.എല്‍. 08 എ.ടി 1234 നമ്പര്‍ കാറിലാണ് ഇവര്‍ കഞ്ചാവ് കടത്തിയത്. മിക്ക കഞ്ചാവ് കടത്ത് കേസുകളിലും യുവാക്കളെയാണ് അറസ്റ്റ് ചെയ്യുന്നത്. സ്ത്രീകളും കഞ്ചാവ് കടത്ത് സംഘങ്ങളില്‍ ഉണ്ടാകാറുണ്ട്. കാറില്‍ കഞ്ചാവ് കടത്തുമ്പോള്‍ സ്ത്രീകള്‍ ഉണ്ടെങ്കില്‍ പോലീസ് പരിശോധനയില്‍ നിന്നും രക്ഷപ്പെടാമെന്നാണ് പ്രതികള്‍ കരുതുന്നത്. പ്രതികളെ ചോദ്യം ചെയ്തുവരികയാണ്. കഞ്ചാവ് ലഭിച്ചത് എവിടെ നിന്നാണ് എന്നതടക്കമുള്ള വിവരങ്ങള്‍ ഉടനെ കണ്ടെത്തുമെന്ന് പോലീസ് അറിയിച്ചു.
