നന്ദിയോട് : വീട്ടുവളപ്പില്‍ കഞ്ചാവ് കൃഷി നടത്തിയ നന്ദിയോട് പഞ്ചായത്ത് പാലുവള്ളി വാര്‍ഡ് മെമ്പറുടെ ഭര്‍ത്താവിനെ കഞ്ചാവുമായി പിടികൂടി. നെടുമങ്ങാട് എക്സൈസ് സര്‍ക്കിള്‍ ഇന്‍സ്പെക്ടര്‍ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. പാലുവള്ളി ഏറെപേരയം തടത്തരികത്ത് വീട്ടില്‍ കൃഷ്ണന്‍ കുട്ടിയെ കഞ്ചാവ് കൈവശം വെച്ചതിനും വീട്ടുപുരയിടത്തില്‍ കഞ്ചാവ് ചെടികള്‍ നട്ടുവളര്‍ത്തി പരിപാലിച്ചതിനും കേസെടുത്തു.
പാലുവള്ളി വാര്‍ഡ് മെമ്പര്‍ പുഷ്‌കലയുടെ ഭര്‍ത്താവ് ആണ് പിടിയിലായ കൃഷ്ണന്‍ കുട്ടി. വീട്ടുപുരയിടത്തില്‍ നിന്നും വിവിധ വലിപ്പത്തിലുള്ള 9 കഞ്ചാവ് ചെടികള്‍ കണ്ടെടുത്തു. നെടുമങ്ങാട്‌എക്സൈസ് സര്‍ക്കിള്‍ ഇന്‍സ്പെക്ടറുടെ നേതൃത്വത്തില്‍ നെടുമങ്ങാട് റേഞ്ച് പാര്‍ട്ടിയും ചേര്‍ന്ന് സംയുക്തമായാണ് പരിശോധന നടത്തിയത്. സര്‍ക്കിള്‍ ഇന്‍സ്പെക്ടര്‍ എസ്.വിനോദ് കുമാറിനോടൊപ്പം എക്സൈസ് ഇന്‍സ്പെക്ടര്‍ ജി.എ ശങ്കറും റേഞ്ച് ഓഫീസിലെയും സര്‍ക്കിള്‍ ഓഫീസിലെയും ഉദ്യോഗസ്ഥരും പങ്കെടുത്തു.
