റാന്നി : പട്ടാപ്പകല് റോഡിലിറങ്ങിയ കാട്ടുപന്നി കാറിലിടിച്ചു. ഇന്നലെ ഉച്ചക്ക് 12.15 ഓടെ കീക്കൊഴൂര് വയലത്തല റോഡിലായിരുന്നു സംഭവം. ബ്ലോക്കുപഞ്ചായത്തംഗം പള്ളിയേത്ത് സാം പി തോമസ് കുടുംബവുമൊത്ത് റാന്നിയില് പോയി മടങ്ങുമ്പോള് വയലത്തല ശ്രീരാമവിലാസം കോളനി ഭാഗത്ത് നടുറോഡിലാണ് കാട്ടുപന്നി കാറിന് കുറുകെ ചാടിയത്. ഇടിയുടെ ആഘാതത്തില് വാഹനത്തിന്റെ മുന് ഭാഗത്ത് കേടുപാടുകള് സംഭവിച്ചു. ഇടികൊണ്ട കാട്ടുപന്നി സമീപത്തെ കൈയാല ചാടി രക്ഷപ്പെട്ടു. വാഹനത്തിന് വേഗത കുറവായതിനാല് അപകടം ഒഴിവായി. വാഹനത്തിനുണ്ടായ നഷ്ടത്തിനും തനിക്കുണ്ടായ മാനസികാഘാതത്തിനും നഷ്ടപരിഹാരം വേണമെന്ന് സാം പി തോമസ് ആവശ്യപ്പെട്ടു. വനം വകുപ്പിനെതിരെ നിയമ നടപടിയുമായി മുന്നോട്ടു പോകാനാണ് തീരുമാനമെന്ന് അദ്ദേഹം പറഞ്ഞു.
