തൊടുപുഴ : അറങ്കുളം മുന്നുങ്കവയല് പാലത്തില് നിന്നും കാര് വെള്ളത്തില് വീണ് ഒലിച്ചുപോയി മരണപ്പെട്ട രണ്ടുപേരെ തിരിച്ചറിഞ്ഞു. കുത്താട്ടുകുളം കിളക്കൊമ്പ് സ്വദേശി നിഖില് ഉണ്ണികൃഷ്ണന് (30), കൂത്താട്ടുകുളം ഒലിയപ്പുറം സ്വദേശി നിമി കെ വിജയന് (28) എന്നിവരാണ് മരണപ്പെട്ടത്. കൂത്താട്ടുകുളം ആയുര്വേദ ആശുപത്രിയില് ജീവനക്കാരായിരുന്നു ഇരുവരും. ശനിയാഴ്ച ഉച്ചയോടെയാണ് അപകടം.
വാഗമണ് ഭാഗത്ത് നിന്നും കാഞ്ഞാര് ഭാഗത്തേക്ക് പോവുകയായിരുന്ന ഇവരുടെ കാര് മലവെള്ളപാച്ചിലില് പെടുകയായിരുന്നു. കാര് ആദ്യം മുന്നങ്കവയലിന് സമീപം സുരക്ഷ ഭീത്തിയില് ഇടിച്ചുനില്ക്കുകയും പിന്നീട് മലവെള്ളത്തിന്റെ ശക്തിയില് സുരക്ഷ ഭിത്തി തകര്ത്ത് ഒലിച്ചു പോവുകയുമായിരിന്നുവെന്നാണ് കണ്ടുനിന്ന മറ്റു യാത്രക്കാരും നാട്ടുകാരും പറയുന്നത്. കാര് ഏതാണ്ട് 500 മീറ്ററോളം താഴേക്ക് ഒഴുകിപ്പോയി. നിഖിലിന്റെയും നിമിയുടെയും മൃതദേഹം കണ്ടെത്തിയത് ഫയര് ആന്റ് റെസ്ക്യൂ സേനയും പോലീസും നാട്ടുകാരും നടത്തിയ തിരച്ചിലിലാണ്.
