മഞ്ചേരി : ലക്ഷങ്ങള് മുടക്കി കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററിലേക്കായി എത്തിച്ച കട്ടിലുകള് ഉപയോഗിക്കാതെ നശിക്കുന്നു. ജില്ലയില് കോവിഡ് രോഗികളുടെ എണ്ണം കൂടിയതോടെ വേട്ടേക്കോട് നോബിള് വനിത കോളജില് ആരംഭിച്ച ചികിത്സ കേന്ദ്രത്തിലാണ് 200 കട്ടിലുകള് വെയിലും മഴയുമേറ്റ് നശിക്കുന്നത്.
ഇവ പുറത്ത് അലക്ഷ്യമായി കൂട്ടിയിട്ട നിലയിലാണ്. ആരോഗ്യ വകുപ്പിന്റെ നേതൃത്വത്തില് ശുചിത്വ മിഷന്റെ സഹകരണത്തോടെയാണ് സെന്റര് പ്രവര്ത്തനം ആരംഭിച്ചത്. നഗരസഭയുടെ കീഴിലുള്ള രണ്ടാമത്തെ ചികിത്സ കേന്ദ്രമായിരുന്നു ഇത്. ആയിരം പേരെ കിടത്തി ചികിത്സിക്കാനുള്ള സൗകര്യമാണ് ഇവിടെ ഒരുക്കിയത്. ആദ്യ ഘട്ടത്തില് 200 പേര്ക്ക് പ്രവേശനം നല്കി. കൂടുതല് പേരെ ഇങ്ങോട്ട് മാറ്റുന്നതിന്റെ ഭാഗമായാണ് കൂടുതല് കട്ടിലുകള് എത്തിച്ചത്.
എന്നാല്, കോളേജ് കെട്ടിടം, ഹോസ്റ്റല് എന്നിവ മാത്രമാണ് ചികിത്സ കേന്ദ്രത്തിന് ലഭിച്ചത്. സ്കൂള് കെട്ടിടം കിട്ടാതെ ആയിരം പേരെ കിടത്തി ചികിത്സിക്കാന് കഴിയില്ലെന്ന് കാണിച്ച് നഗരസഭ നോഡല് ഓഫീസര് ശുചിത്വ മിഷന് ജില്ല കോഓഡിനേറ്ററെ അറിയിച്ചിട്ടുണ്ടെന്ന് നഗരസഭ ചെയര്പേഴ്സന് വി.എം. സുബൈദ പറഞ്ഞു. എന്നാല്, മഞ്ചേരി നഗരസഭയുടെ അനാസ്ഥയാണ് കട്ടില് ഉപയോഗിക്കാതെ കിടക്കുന്നതെന്ന് കാണിച്ച് പ്രതിപക്ഷ നേതാവ് അഡ്വ. കെ. ഫിറോസ് ബാബു ജില്ല കലക്ടര്ക്ക് പരാതി നല്കി.