പാനൂര്‍: കുട്ടിയുടെ കഴുത്തില്‍നിന്ന് സ്വര്‍ണമാല തട്ടിപ്പറിച്ച സംഭവത്തില്‍ സ്ത്രീ അറസ്റ്റിലായി. ചമ്പാട്ട് സ്വദേശി അയിഷ (50)യാണ് അറസ്റ്റിലായത്. മോഷ്ടിച്ച സ്വര്‍ണമാല പാനൂരിലെ സ്വര്‍ണക്കടയില്‍ നിന്നും പോലീസ് കണ്ടെടുത്തു. കഴിഞ്ഞ ജനുവരി 27-നായിരുന്നു മോഷണം നടന്നത്. പാനൂര്‍ സാമൂഹികാരോഗ്യകേന്ദ്രത്തില്‍ ഡോക്ടറെ കാണാന്‍ ക്യുനിന്ന കടവത്തൂരിലെ സ്ത്രീയുടെ ഒപ്പമുണ്ടായിരുന്ന കുട്ടിയുടെ കഴുത്തിലെ സ്വര്‍ണമാലയാണ് അയിഷ മോഷ്ടിച്ചത്.
ആശുപത്രിയിലെ സി.സി.ടി.വി. ക്യാമറയില്‍ മാല പൊട്ടിക്കുന്ന ദൃശ്യം പതിഞ്ഞിരുന്നു. എന്നാല്‍ ശരീരഭാഗങ്ങള്‍ മുഴുവന്‍ വസ്ത്രംകൊണ്ട് മൂടിയിരുന്നതിനാല്‍ പ്രതിയെ തിരിച്ചറിയാന്‍ പോലീസിന് കഴിഞ്ഞിരുന്നില്ല. പോലീസ് നടത്തിയ നിരന്തര അന്വേഷണത്തിലൂടെയാണ് പ്രതി അറസ്റ്റിലായത്.
