ചായ്പന്കുഴി : കാട്ടാന ആക്രമണത്തില് വയോധികന് കൊല്ലപ്പെട്ട സംഭവത്തില് പ്രതിഷേധിച്ച് ചായ്പന്കുഴി ഫോറസ്റ്റ് ഓഫീസ് നാട്ടുകാര് അടിച്ചുതകര്ത്തു. ഓഫീസിലേക്ക് അതിക്രമിച്ച് കയറാന് ശ്രമിച്ചവരെ ഉദ്യോഗസ്ഥര് തടഞ്ഞു. ഉദ്യോഗസ്ഥരെ തള്ളിമാറ്റി അകത്തുകടന്ന ഇവര് മേശകളും കസേരകളും അടിച്ചൊടിച്ചു. ഫയലുകളെല്ലാം വലിച്ചെറിഞ്ഞു. ടി വിയും കമ്പ്യൂട്ടറുകളടക്കമുള്ളവ അടിച്ചു തകര്ത്തു. ജനല് ചില്ലുകളെല്ലാം തകര്ത്തിട്ടുണ്ട്. ജീവനക്കാര്ക്ക് നേരേയും കയ്യേറ്റമുണ്ടായി. അരമണിക്കൂറോളം ഭീകാരന്തരീക്ഷം സൃഷ്ടിച്ച ഇവര് പോലീസെത്തിയതോടെയാണ് ശാന്തരായത്. പ്രദേശത്ത് കുറേ നാളുകളായി കാട്ടാന ആക്രമണം രൂക്ഷമാണ്.
കൃഷി നശിപ്പിക്കുന്നത് പതിവായി മാറി. ഇതിന് പുറമെയാണ് കാട്ടാന ആക്രമണവുമുണ്ടാകുന്നത്. പലരും തലനാരിഴക്കാണ് ആനകളുടെ ആക്രമണത്തില് നിന്നും രക്ഷപ്പെടുന്നത്. ഇത് സംബന്ധിച്ച് നിരവധി പരാതികള് നല്കിയിട്ടും വനംവകുപ്പിന്റെ ഭാഗത്ത് നിന്ന് സംരക്ഷണമൊരുക്കുന്നതടക്കമുള്ള നടപടികളുണ്ടാകുന്നില്ലെന്നാണ് പരാതി. ഇതിനിടെയാണ് അപ്രതീക്ഷിതമായി തിങ്കള് രാവിലെ പ്രദേശവാസിയായ വയോധികന് കാട്ടാന ആക്രമണത്തില് കൊല്ലപ്പെട്ടത്. ഇതില് പ്രതിഷധിച്ച് നാട്ടുകാര് ഫോറസ്റ്റ് ഓഫീസിന് മുന്നില് പ്രതിഷേധം നടത്തിയത്.
ഉച്ചയായിട്ടും സമരക്കാര് പിരിഞ്ഞുപോതാതിരുന്ന സാഹചര്യത്തില് ആര്ഡിഒ ഷിബു സ്ഥലത്തെത്തി സമരക്കാരുമായി ചര്ച്ച നടത്തി. കുടുംബത്തിന് നഷ്ടപരിഹാരമായി അഞ്ച് ലക്ഷം കൈമാറി. ആശ്രിതര്ക്ക് താത്കാലിക ജോലി നല്കാമെന്ന ഉറപ്പും ബന്ധപ്പെട്ടവര് നല്കിയതിനെ തുടര്ന്നാണ് സമരക്കാര് പിരിഞ്ഞ് പോയത്. ബെന്നി ബെഹനാന് എം പി, സനീഷ്കുമാര് ജോസഫ് എംഎല്എ എന്നിവരും സ്ഥലത്തെത്തിയിരുന്നു.
