തൃശൂര്: നീണ്ട നാളുകള്ക്കു ശേഷം കേരളം മത്തി ചാകരയ്ക്ക് സാക്ഷ്യം വഹിച്ചു. വാടാനപ്പള്ളി കടപ്പുറത്താണ് മത്തി ചാകര. പൊക്കാഞ്ചേരി ബീച്ചില് രാവിലെ ആറ് മണിയോടെയാണ് കരയിലേയ്ക്ക് തിരമാലയോടൊപ്പം മത്തി വന്നടിഞ്ഞത്. കടപ്പുറത്തെത്തിയവര് ചാകര കണ്ടതോടെ നാട്ടുകാരെ അറിയിക്കുകയായിരുന്നു. പിന്നാലെ മത്സ്യം വാരി കൊണ്ടു പോകാന് ആളുകള് കടപ്പുറത്തേയ്ക്ക് ഇരച്ചെത്തി.
ഇപ്പോഴും ചാകര തുടരുകയാണ്. തിരമാലയോടൊപ്പം തീരത്തേക്ക് മത്സ്യങ്ങള് വന്നടിയുന്നുണ്ട്. ചാകര കാണുവാനും മത്സ്യം ശേഖരിക്കാനും നിരവധിയാളുകളാണ് വാടാനപ്പള്ളി കടപ്പുറത്തേയ്ക്ക് എത്തുന്നത്. കാലാവസ്ഥാ വ്യതിയാനത്തെ തുടര്ന്ന് കാണാതായി തുടങ്ങിയ നെയ്മത്തി വീണ്ടും കേരള തീരത്ത് തിരിച്ചെത്തുന്നുവെന്ന് റിപ്പോര്ട്ടുകള് വന്നിരുന്നു. ഇതിനിടയാണ് വലിയ ഒരു ഇടവേളയ്ക്ക് ശേഷം മത്തി ചാകരക്ക് കടല്ത്തീരം സാക്ഷ്യം വഹിച്ചിരിക്കുന്നത്.
