തിരുമൂലപുരം : ഹയർ സെക്കണ്ടറി വിഭാഗം ചക്യാർകൂത്ത് മത്സരത്തിൽ ജേഷ്ഠന്റെ ശിക്ഷണത്തിൽ ഒന്നാം സ്ഥാനത്തിന് അർഹനായതിന്റെ സന്തോഷത്തിൽ ആണ് കൈപ്പട്ടൂർ ജി വി എച്ച് എസ് എസ് പ്ലസ് വൺ വിദ്യാർത്ഥിയായ സുമിത് എസ് ബാബു. കലാക്ഷേത്രത്തിലെ വിദ്യാർത്ഥിയും സഹോദരനുമായ സുനിത് ബാബു ആണ് സുമിത്തിനെ ചക്യാർകൂത്ത് അഭ്യസിപ്പിക്കുന്നത്.സാധാരണ ഗതിയിൽ പഠനം പൂർത്തിയാക്കി ചക്യാർ കൂത്ത് അരങ്ങിൽ എത്തിക്കണമെങ്കിൽ നല്ലൊരു തുക തന്നെ ചിലവാകും. ഈ അവസരത്തിൽ ആണ് സ്വന്തം ജേഷ്ഠൻ പകർന്നു തന്ന ചക്യാർ കൂത്തിലൂടെ സുമിത് കാണികളെ കയ്യിലെടുത്തത്.
ലങ്ക കത്തിക്കാൻ പുറപ്പെട്ട ഹനുമാൻ സ്വാമിയുടെ കഥ “അംഗതന്റെ ലങ്ക പുറപ്പാട് ” എന്ന പേരിലാണ് കൂത്തരംങ്ങിൽ എത്തിച്ചത്. പ്രതീക്ഷിച്ചതിലും അപ്പുറം ആസ്വാദക മനസുകളെ കീഴടക്കാനും കഴിഞ്ഞു എന്ന് സുമിത് പറയുന്നു. ആറ് വയസുമുതൽ ചാക്യാർ കൂത്ത് സുമിത് അഭ്യസിക്കുന്നുണ്ട്.2019 ൽ നടന്ന സംസ്ഥാന സ്കൂൾ കലോത്സവത്തിലും എ ഗ്രേഡ് നേടിയിരുന്നു. മല്ലപ്പള്ളി അഞ്ചുരുക്കാട്ട് ചെങ്കല്ലിൽ വീട്ടിൽ ബസ്സ് ജീവനക്കാരനായ സുരേഷ് ബാബുവിന്റെയും മിനിയുടെയും മകനാണ് സുമിത്.