ചെങ്ങന്നൂര്: അമ്മയെ തോല്പ്പിച്ച സ്ഥാനാര്ഥിക്കെതിരെ 15 വര്ഷങ്ങള്ക്കു ശേഷം വിദ്യാര്ഥിനിയായ മകള് നേര്ക്കുനേര് ഏറ്റുമുട്ടുന്നു. ചെങ്ങന്നൂര് നഗരസഭ മലയില് 15ാം വാര്ഡിലാണ് സിറ്റിങ് കൗണ്സിലറും കോളജ് വിദ്യാര്ഥിനിയും മാറ്റുരക്കുന്നത്.
കൗണ്സിലിലെ സ്ഥിരം സമിതി ചെയര്പേഴ്സനും നഗരസഭ മുന് ചെയര്പേഴ്സനുമായ കോണ്ഗ്രസിലെ ശോഭാ വര്ഗീസും കേരള സര്വകലാശാല എം.കോം വിദ്യാര്ഥിയും എസ്.എഫ്.ഐ പ്രവര്ത്തകയുമായ എല് ഡി.എഫിലെ റിയ സൂസന് വര്ഗീസും (23) തമ്മിലാണ് മത്സരം. 2005 ല് എട്ടാം വാര്ഡായിരുന്നപ്പോള് അന്ന് യു.ഡി.എഫ് സ്ഥാനാര്ഥിയായിരുന്ന ശോഭാ വര്ഗീസിന്റെ എതിരാളിയായിരുന്നു റിയ സൂസന് വര്ഗീസിന്റെ അമ്മയായ ജിയ വര്ഗീസ്. അന്ന് എല്.ഡി.എഫിലെ ഘടക കക്ഷിയായിരുന്ന ജനതാദളിന്റെ സീറ്റില് മത്സരിച്ച ഇവര് 38 വോട്ടിനാണ് പരാജയപ്പെട്ടത്.
ശോഭാ വര്ഗീസ് 15 വര്ഷം തുടര്ച്ചയായി വിവിധ വാര്ഡുകളെ പ്രതിനിധാനം ചെയ്ത മുനിസിപ്പല് കൗണ്സിലര് ആണ്. നിലവില് അങ്ങാടിക്കല് 14ാം വാര്ഡിന്റെ സിറ്റിങ് മെമ്പറാണ്. 2010ല് ഇപ്പോഴത്തെ മലയില് വാര്ഡിനെയും പ്രതിനിധാനം ചെയ്തിരുന്നു. കഴിഞ്ഞ 40 വര്ഷത്തെ തുടര്ച്ചയായുള്ള യു.ഡി.എഫ് ഭരണം മലയില് വാര്ഡിനെയും വിശേഷിച്ച് നഗരസഭയുടെ മൊത്തത്തിലുള്ള വികസനത്തെയും പിന്നോട്ടടിച്ചതിനുള്ള പരിഹാരം കാണുകയെന്ന രാഷ്ട്രീയ ലക്ഷ്യം നിറവേറ്റുകയാണ് മത്സരത്തിലൂടെയെന്ന് റിയ പറയുന്നു. ചെങ്ങന്നൂര് ക്രിസ്ത്യന് കോളജില് നിന്നാണ് റിയ സൂസന് കോമേഴ്സില് ബിരുദം പൂര്ത്തിയാക്കിയത്. എസ്.എഫ് ഐ യുടെ സജീവ പ്രവര്ത്തകയും ക്ലാസ് പ്രതിനിധിയുമായിരുന്നു. നല്ല പ്രാസംഗികയുമാണ്. ശോഭാ വര്ഗീസ് നിലവില് കോണ്ഗ്രസ് ബ്ലോക്ക് കമ്മിറ്റി അംഗമാണ്.