ചെന്നൈ: പൂര്‍വ വിദ്യാര്‍ഥിനിയുടെ ലൈംഗികാതിക്രമ പരാതില്‍ ചെന്നൈ ഡാന്‍സ് അക്കാദമിയിലെ മലയാളി അസിസ്റ്റന്റ് പ്രൊഫസറെ പൊലീസ് അറസ്റ്റ് ചെയ്തു. രുക്മിണി ദേവി കോളജ് ഓഫ് ഫൈന്‍ ആര്‍ട്സിലെ നൃത്താധ്യാപകനായ ഹരിപത്മനാണ് അറസ്റ്റിലായത്. മലയാളിയായ പൂര്‍വ വിദ്യാര്‍ഥിനി നല്‍കിയ പരാതിയില്‍ ഇയാള്‍ക്കെതിരെ നേരത്തേ കേസെടുത്തിരുന്നു. ഐപിസി സെക്ഷന്‍ 354എ, 509 തുടങ്ങിയ വകുപ്പുകള്‍ ചുമത്തിയാണ് കേസ്. ലൈംഗികാതിക്രമ പരാതി ആരോപിക്കപ്പെട്ട കോളേജിലെ നാല് ഫാക്കല്‍റ്റി അംഗങ്ങളില്‍ ഒരാളാണ് ഇയാള്‍.
അധ്യാപകര്‍ക്കെതിരെ നടപടി ആവശ്യപ്പെട്ട് വിദ്യാര്‍ഥികള്‍ ശക്തമായ രീതിയില്‍ പ്രതിഷേധിച്ചിരുന്നു. അധ്യാപകര്‍ക്കെതിരെ ലൈംഗികാതിക്രമം, ബോഡി ഷെയ്മിങ്, അധിക്ഷേപം തുടങ്ങിയ കുറ്റങ്ങള്‍ ആരോപിച്ച് 90 വിദ്യാര്‍ഥികള്‍ സംസ്ഥാന വനിതാ കമ്മിഷന് പരാതി നല്‍കിയിരുന്നു. കുറ്റക്കാരെന്ന് കണ്ടെത്തിയാല്‍ അധ്യാപകര്‍ക്കെതിരെ കര്‍ശന നടപടി സ്വീകരിക്കുമെന്ന് തമിഴ്‌നാട് മുഖ്യമന്ത്രി എം.കെ.സ്റ്റാലിനും വ്യക്തമാക്കിയിരുന്നു.
