മുംബൈ: മഹാരാഷ്ട്രയിലെ മുതിര്‍ന്ന ബി.ജെ.പി നേതാവ് ഏക്നാഥ് ഖാദ്സേ പാര്‍ട്ടി വിട്ടു. വൈകാതെ അദ്ദേഹം എന്‍.സി.പിയില്‍ ചേരുമെന്ന് മഹാരാഷ്ട്ര മന്ത്രി ജയന്ത് പാട്ടീല്‍ അറിയിച്ചു. വെള്ളിയാഴ്ച രണ്ട് മണിക്ക് നടക്കുന്ന ചടങ്ങില്‍ അദ്ദേഹം ഔദ്യോഗികമായി എന്‍.സി.പി പക്ഷത്ത് എത്തും.
ഏക്നാഥ് ഖാദ്സേയുടെ രാജിക്കത്ത് ലഭിച്ച വിവരം ബി.ജെ.പിയും സ്ഥിരീകരിച്ചിട്ടുണ്ട്. ഇന്ന് രാവിലെ വരെ അദ്ദേഹം ബി.ജെ.പിയുടെ ഭാഗമായിരുന്നു. പാര്‍ട്ടിയില്‍ തുടരാന്‍ ഞങ്ങളെല്ലാവരും അദ്ദേഹത്തെ നിര്‍ബന്ധിച്ചു. ഖാദ്സേയുടെ ഭാവി യാത്രക്ക് എല്ലാവിധ ആശംസകളും നേരുന്നുവെന്ന് ബി.ജെ.പി വക്താവ് കേശവ് ഉപാധ്യായ പറഞ്ഞു.
കഴിഞ്ഞ കുറേ മാസങ്ങളായി ഖാദ്സേ എന്‍.സി.പിയില്‍ ചേരുമെന്ന് അഭ്യൂഹങ്ങളുണ്ടായിരുന്നു.എന്‍.സി.പി നേതാവ് ശരത് പവാറും ഇതുമായി ബന്ധപ്പെട്ട് പ്രസ്താവന നടത്തിയിരുന്നു. മഹാരാഷ്ട്രയില്‍ ബി.ജെ.പിയെ പടുത്തുയര്‍ത്തുന്നതില്‍ ഖാദ്സേയുടെ പങ്ക് വിസ്മരിക്കാനാവില്ലെന്നായിരുന്നു പവാറിന്റെ പ്രസ്താവന. ധനകാര്യമന്ത്രിയെന്ന നിലയിലും പ്രതിപക്ഷ നേതാവെന്ന നിലയിലും അദ്ദേഹം മികച്ച പ്രവര്‍ത്തനം കാഴ്ചവെച്ചു. പാര്‍ട്ടിയില്‍ അവഗണിക്കുന്നുവെന്ന തോന്നലില്‍ അദ്ദേഹം ചിലപ്പോള്‍ ബി.ജെ.പി വിട്ട് മറ്റൊരു പാര്‍ട്ടിക്കൊപ്പം ചേര്‍ന്ന് പ്രവര്‍ത്തിച്ചേക്കാമെന്ന് പവാര്‍ പറഞ്ഞിരുന്നു.
അഴിമതി ആരോപണങ്ങളെ തുടര്‍ന്ന് ദേവേന്ദ്ര ഫഡ്നാവിസ് മന്ത്രിസഭയില്‍ നിന്ന് ഖാദ്സേ രാജിവെച്ചിരുന്നു. അദ്ദേഹത്തിന്റെ രാജിക്ക് പിന്നില്‍ ഫഡ്നാവിസ് തന്നെയാണെന്നായിരുന്നു അനുയായികള്‍ ആരോപിച്ചിരുന്നത്. 2019 നിയമസഭ തെരഞ്ഞെടുപ്പില്‍ അദ്ദേഹത്തിന് സീറ്റുനല്‍കിയിരുന്നില്ല.
