പാലക്കാട് : വീടിനുള്ളില്‍ സഹോദരങ്ങളോടൊപ്പം കളിക്കുന്നതിനിടെ പെട്ടെന്ന് പുറത്തേക്കിറങ്ങിയ ഒന്നരവയസ്സുകാരന്‍ വീടിനോടു ചേര്‍ന്നുള്ള സ്വിമ്മിങ് പൂളില്‍ വീണ് മരിച്ചു. പാലക്കാട് പെരുവെമ്പ് തണ്ണിശ്ശേരി കണ്ണോട്ട്കാട് മെഡോസ് ഗാര്‍ഡന്‍ റിച്ചൂസ് ഹൗസില്‍ മുഹമ്മദ് റിയാസിന്‍റെ മകന്‍ മുഹമ്മദ് റമീനാണു മരിച്ചത്. വീടിനുള്ളില്‍ സഹോദരങ്ങളോടൊപ്പം കളിക്കുകയായിരുന്ന കുഞ്ഞ് പെട്ടെന്ന് പുറത്തിറങ്ങുകയായിരുന്നു. ഏറെ നേരമായിട്ടും കാണാതായതോടെ പ്രദേശത്തു മുഴുവന്‍ തിരച്ചില്‍ നടത്തി. ഇതിനിടെ മുഹമ്മദ് റിയാസിന്‍റെ അനുജന്‍ മുഹമ്മദ് ഹാരിസാണു കുഞ്ഞിനെ സ്വിമ്മിങ് പൂളില്‍ അബോധാവസ്ഥയില്‍ കണ്ടെത്തിയത്. ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
