സര്‍ക്കാര്‍ ഓഫീസുകളിലെ ചൈനീസ് സിസിടിവികള്‍ക്ക് ‘കടക്ക് പുറത്ത്’; ഓസ്‌ട്രേലിയയുടേത് വിവേചനമെന്ന് ചൈന

ഓസ്ട്രേലിയ : അമേരിക്കയടക്കമുള്ള ലോകരാജ്യങ്ങളുടെ വ്യോമാതിര്‍ത്തിയില്‍ ചൈനയുടെ ചാര ബലൂണുകള്‍ പറന്നുയരുന്നുവെന്ന വാര്‍ത്തകള്‍ കോളിളക്കം സൃഷ്ടിച്ചിരുന്നു. ഇതിന് പിന്നാലെ കടുത്ത നടപടിയുമായി ഓസ്ട്രേലിയ. സര്‍ക്കാര്‍ കെട്ടിടങ്ങളിലും രാജ്യത്തെ നേതാക്കളുടെ ഓഫീസുകളിലും സ്ഥാപിച്ച ചൈന നിര്‍മ്മിത സിസിടിവി ക്യാമറകള്‍ നീക്കം ചെയ്യാനാണ് തീരുമാനം. സുരക്ഷാ പ്രശ്നങ്ങള്‍ കണക്കിലെടുത്താണ് നടപടിയെന്ന് ഓസ്ട്രേലിയന്‍ പ്രതിരോധ മന്ത്രി റിച്ചാര്‍ഡ് മാര്‍ലെസ് വ്യക്തമാക്കി.

ചൈനയില്‍ നിര്‍മ്മിച്ച സിസിടിവി ക്യാമറകള്‍ തന്ത്രപ്രധാനമായ കെട്ടിടങ്ങളില്‍ നിന്ന് നീക്കം ചെയ്യുമെന്ന് കഴിഞ്ഞ ദിവസമാണ് റിച്ചാര്‍ഡ് മാര്‍ലെസ് പ്രഖ്യാപിച്ചത്. പ്രതിരോധ വകുപ്പ് ഉള്‍പ്പെടെ 250 ലധികം സര്‍ക്കാര്‍ കെട്ടിടങ്ങളില്‍ 913 ചൈനീസ് സിസിടിവി ക്യാമറകള്‍ സ്ഥാപിച്ചിട്ടുണ്ട്. തന്‍റെ മന്ത്രാലയത്തിന്‍റെ കെട്ടിടങ്ങളില്‍ സ്ഥാപിച്ചിട്ടുള്ള ഈ സിസിടിവി ക്യാമറകളെല്ലാം നീക്കം ചെയ്യുമെന്ന് അദ്ദേഹം അറിയിച്ചു. ഇത് ഒരു പ്രശ്‌നമാണ്. പ്രതിരോധ വകുപ്പിന്‍റെ എല്ലാ നിരീക്ഷണ സാങ്കേതികവിദ്യയും ഞങ്ങള്‍ വിലയിരുത്തുകയാണ്. ചൈനയില്‍ നിര്‍മ്മിച്ച ക്യാമറകള്‍ എവിടെ കണ്ടാലും അവ നീക്കം ചെയ്യപ്പെടും.

65 സിസിടിവി ക്യാമറകള്‍ തങ്ങളുടെ കെട്ടിടത്തില്‍ പ്രവര്‍ത്തിക്കുന്നുണ്ടെന്ന് ധനമന്ത്രാലയവും സ്ഥിരീകരിച്ചു. ഈ ക്യാമറകള്‍ ക്രമേണ നീക്കം ചെയ്തുവരികയാണ്. കുറഞ്ഞത് 40 സിസിടിവി ക്യാമറകളെങ്കിലും ഇവിടെ നിന്ന് നീക്കം ചെയ്യും. ഏപ്രിലോടെ ഇവ പൂര്‍ണമായും മാറ്റിസ്ഥാപിക്കും. ഈ സിസിടിവി ക്യാമറകള്‍ ഇന്റര്‍നെറ്റുമായി ബന്ധിപ്പിച്ചിട്ടില്ലെന്നും മുന്‍കരുതലെന്ന നിലയിലാണ് ഇവ നീക്കം ചെയ്യുന്നതെന്നും വകുപ്പ് അറിയിച്ചു.

രാജ്യത്തെ 250-ലധികം സര്‍ക്കാര്‍ കെട്ടിടങ്ങളില്‍ ചൈനീസ് കമ്പനികളായ ഹാങ്സോ ഹൈവിഷന്‍ ഡിജിറ്റല്‍ ടെക്നോളജി, ഡഹുവ ടെക്നോളജി എന്നിവ ആയിരത്തോളം ക്യാമറകള്‍ സ്ഥാപിച്ചിട്ടുണ്ടെന്ന് തന്‍റെ ഓഡിറ്റില്‍ കണ്ടെത്തിയതായി പ്രതിപക്ഷ എംപി ജെയിംസ് പാറ്റേഴ്സണ്‍ പറഞ്ഞു. നേരത്തെ അമേരിക്കയും ബ്രിട്ടനും ഇതേ നടപടി സ്വീകരിച്ചിരുന്നു. കഴിഞ്ഞ വര്‍ഷം നവംബറില്‍ ചൈനീസ് ബ്രാന്‍ഡുകളുടെ നിരവധി ക്യാമറകളും ഇന്റര്‍ഫേസുകളും യുഎസ് സര്‍ക്കാര്‍ നിരോധിച്ചിരുന്നു. ഹിക്വിഷന്‍ നിര്‍മ്മിച്ച സുരക്ഷാ ക്യാമറകള്‍ യുകെ സര്‍ക്കാര്‍ നവംബറില്‍ തന്നെ നിരോധിച്ചിരുന്നു.

ചൈനയുടെ പ്രതികരണം
ഓസ്ട്രേലിയന്‍ സര്‍ക്കാരിന്‍റെ നീക്കം തെറ്റാണെന്ന് വിശേഷിപ്പിച്ച ചൈന, നിരീക്ഷണ ക്യാമറ കമ്പനികളോട് നീതി പുലര്‍ത്തണമെന്ന് ആവശ്യപ്പെട്ടു. വിപണി തത്വങ്ങള്‍ക്കും അന്താരാഷ്ട്ര ചട്ടങ്ങള്‍ക്കും അനുസൃതമായി ചൈനീസ് കമ്പനികളുടെ വിദേശ നിക്ഷേപം ചൈനീസ് സര്‍ക്കാര്‍ എപ്പോഴും പ്രോത്സാഹിപ്പിച്ചിട്ടുണ്ടെന്ന് ചൈനയുടെ വിദേശകാര്യ മന്ത്രാലയ വക്താവ് മാവോ നിംഗ് പറഞ്ഞു. ദേശീയ സുരക്ഷ എന്ന ആശയത്തെ സാമാന്യവല്‍ക്കരിക്കുകയും ചൈനീസ് കമ്പനികളോട് വിവേചനം കാണിക്കുകയും ചെയ്യുന്ന അത്തരം സമീപനങ്ങളെ എതിര്‍ക്കുന്നുവെന്നും അദ്ദേഹം കൂട്ടിച്ചേര്‍ത്തു. ചൈനീസ് കമ്പനികള്‍ക്ക് ന്യായമായതും വിവേചനരഹിതവുമായ അന്തരീക്ഷം ഓസ്ട്രേലിയ നല്‍കുമെന്ന് പ്രതീക്ഷിക്കുന്നു. ഇതോടൊപ്പം ഇരുവിഭാഗങ്ങള്‍ക്കുമിടയില്‍ പരസ്പര വിശ്വാസവും സഹകരണവും വര്‍ധിപ്പിക്കുന്ന നടപടികള്‍ കൈക്കൊള്ളും.

കഴിഞ്ഞയാഴ്ച അമേരിക്കന്‍ വ്യോമാതിര്‍ത്തിയില്‍ കണ്ടെത്തിയ ചൈനീസ് ചാര ബലൂണ്‍ യുഎസ് യുദ്ധവിമാനങ്ങള്‍ വെടിവെച്ച് വീഴ്ത്തിയിരുന്നു. ചൈന ഇത്തരം പല തന്ത്രങ്ങളിലൂടെ ചാരവൃത്തി നടത്തുന്നതായി ആക്ഷേപമുണ്ട്. ഈ ആരോപണം നിലനില്‍ക്കെയാണ് സുരക്ഷാ അപകടങ്ങള്‍ തിരിച്ചറിഞ്ഞ് പ്രതിരോധ മന്ത്രാലയത്തിന്റെ കെട്ടിടങ്ങളില്‍ സ്ഥാപിച്ചിരിക്കുന്ന ചൈനീസ് നിര്‍മ്മിത ക്യാമറകള്‍ നീക്കം ചെയ്യാന്‍ ഓസ്ട്രേലിയന്‍ സര്‍ക്കാര്‍ തീരുമാനിച്ചത്.

വീഡിയോ എഡിറ്ററെ ആവശ്യമുണ്ട്
Eastindia Broadcasting Pvt. Ltd. ന്റെ ഉടമസ്ഥതയിലുള്ള പ്രമുഖ ഓണ്‍ലൈന്‍ ന്യൂസ് ചാനല്‍ ആയ പത്തനംതിട്ട മീഡിയായിലേക്ക് വീഡിയോ എഡിറ്ററെ ആവശ്യമുണ്ട്. യോഗ്യരായ ഉദ്യോഗാര്‍ത്ഥികളില്‍ നിന്നും അപേക്ഷകള്‍ ക്ഷണിക്കുന്നു. ഏതെങ്കിലും ഓണ്‍ലൈന്‍ ന്യുസ് ചാനലിന്റെ വീഡിയോ പ്ലാറ്റ്ഫോം കൈകാര്യം ചെയ്തുള്ള പരിചയം ഉണ്ടായിരിക്കണം. പത്തനംതിട്ട ഓഫീസില്‍ ആയിരിക്കും ജോലി ചെയ്യേണ്ടത്. ശമ്പളം തുടക്കത്തില്‍ 15000 രൂപാ പ്രതിമാസം ലഭിക്കും. താല്‍പ്പര്യമുള്ളവര്‍ പാസ്പോര്‍ട്ട് സൈസ് ഫോട്ടോ സഹിതം വിശദമായ ബയോഡാറ്റാ മെയില്‍ ചെയ്യുക. [email protected] കൂടുതല്‍ വിവരങ്ങള്‍ക്ക് 94473 66263, 85471 98263, 0468 2333033 എന്നീ നമ്പരുകളില്‍ ബന്ധപ്പെടാം.