കൊച്ചി : സംസ്ഥാനത്തെ ആരാധനാലയങ്ങള്‍ തുറക്കാന്‍ അനുമതി നല്‍കണമെന്ന ആവശ്യവുമായി മലങ്കര ഓര്‍ത്തഡോക്സ് സുറിയാനി സഭ. കോവിഡ് മാനദണ്ഡങ്ങള്‍ പാലിച്ചുകൊണ്ട് ആരാധനാലയങ്ങള്‍ തുറക്കാന്‍ അനുമതി നല്‍കണമെന്നാണ് ആവശ്യം.
ജീവകാരുണ്യ പ്രവര്‍ത്തനങ്ങള്‍ ഏകോപിപ്പിക്കുവാനും വിശ്വാസികളുടെ മാനസീക സംഘര്‍ഷങ്ങള്‍ കുറക്കുവാനും ആരാധാനാലയങ്ങള്‍ തുറക്കുന്നതിലൂടെ സാധിക്കുമെന്നും സഭാ അസോസിയേഷന്‍ സെക്രട്ടറി അഡ്വ.ബിജു ഉമ്മന്‍ പറഞ്ഞു. കഴിഞ്ഞ ദിവസം മുസ്‌ലിം സംഘടനകളും സമാന ആവശ്യവുമായി രംഗത്ത് വന്നിരുന്നു.
സംസ്ഥാനത്ത് നാല്‍പ്പത് ദിവസത്തെ ഇടവേളയ്ക്ക് ശേഷം നിയന്ത്രണങ്ങളില്‍ അയവു വന്നിരിക്കുകയാണ്. ടി.പി.ആര്‍ കുറഞ്ഞ സ്ഥലങ്ങളില്‍ എല്ലാ കടകളും പ്രവര്‍ത്തിച്ചുതുടങ്ങി. കെ.എസ്.ആര്‍.ടി.സി സര്‍വ്വീസുകളടക്കം പൊതുഗതാഗതം സാധാരണ നിലയിലേക്ക് മാറി. സെക്രട്ടറിയറ്റടക്കമുള്ള ഓഫീസുകളും സജീവമാണ്. അതേ സമയം സംസ്ഥാനത്താകെ 25 തദ്ദേശസ്ഥാപനങ്ങളില്‍ ട്രിപ്പിള്‍ ലോക്ക്ഡൗണ്‍ തുടരുന്നുണ്ട്.
