പത്തനംതിട്ട : ഓമല്ലൂർ ആര്യഭാരതി ഹൈസ്കൂളിൽ സിവിൽ സർവീസ് അക്കാദമിക്ക് തുടക്കമായി. വിദ്യാർത്ഥികളിൽ സിവിൽ സർവീസ് പരീക്ഷകളോടുള്ള താൽപര്യവും നേതൃത്വപാടവവും വളർത്തുക എന്ന ലക്ഷ്യത്തോടെയാണ് സിവിൽ സർവീസ് അക്കാദമി ആരംഭിച്ചിരിക്കുന്നത്. കേരള സംസ്ഥാന സിവിൽ സർവീസ് അക്കാദമിയുടെയും ഓമല്ലൂർ ആര്യഭാരതി ഹൈസ്കൂളിന്റെയും സംയുക്ത ആഭിമുഖ്യത്തിലാണ് പദ്ധതി. സ്കൂൾ ഓഡിറ്റോറിയത്തിൽ നടന്ന ചടങ്ങിൽ പത്തനംതിട്ട എം.പി. ആന്റോ ആന്റണി അക്കാദമിയുടെ ഉദ്ഘാടനം നിർവഹിച്ചു. പി.ടി.എ പ്രസിഡന്റ് സജി വർഗീസ് അധ്യക്ഷത വഹിച്ചു. സ്കൂൾ ഹെഡ്മാസ്റ്റർ ഫിബി അഗസ്റ്റസ് മാത്യു സ്വാഗതം ആശംസിച്ചു. പത്തനംതിട്ട അതിരൂപത വികാർ ജനറലും എം.എസ്.സി സ്കൂളുകളുടെ കോറസ്പോണ്ടന്റുമായ മോൺ. വർഗീസ് മാത്യു കാലായിൽ വടക്കേതിൽ അനുഗ്രഹപ്രഭാഷണം നടത്തി.
പത്തനംതിട്ട ജില്ലാ പഞ്ചായത്ത് പ്രസിഡന്റ് ദീനാമ്മ റോയ് മുഖ്യപ്രഭാഷണം നടത്തി. സിവിൽ സർവീസ് പരീക്ഷാ പരിശീലകനും മെന്ററുമായ പി. ടി.സുനിൽ കുമാർ വിഷയാവതരണം നടത്തി. യു.പി.എസ്.സി 2025 പരീക്ഷയിൽ AIR 362 നേടിയ അമൽ കാമ്പിയിൽ വിദ്യാർത്ഥികൾക്ക് പ്രചോദനാത്മക സന്ദേശം നൽകി. കേരള സ്റ്റേറ്റ് സിവിൽ സർവീസ് അക്കാദമി കോ-ഓർഡിനേറ്റർ അബ്ദുൽ സഫീർ, ലോക്കൽ മാനേജർ റവ. ഡോ. ആന്റോ കണ്ണാംകുളം, വാർഡ് മെമ്പർ കെ.എ.വർഗീസ് എന്നിവർ ആശംസകൾ അർപ്പിച്ചു. സ്റ്റാഫ് സെക്രട്ടറി സുനിത മാത്യു നന്ദി രേഖപ്പെടുത്തി. സ്കൂളിലെ വിദ്യാർത്ഥികൾക്ക് സിവിൽ സർവീസ് ഉൾപ്പെടെയുള്ള മത്സരപരീക്ഷകൾക്കായുള്ള ക്രമബദ്ധമായ പരിശീലനം നൽകുന്നതിന്റെ ഭാഗമായാണ് അക്കാദമി ആരംഭിച്ചത്.
