കണ്ണൂർ : റെയിൽവേ പാളം മുറിച്ചുകടക്കുന്നതിനിടെ ട്രെയിൻ തട്ടി പത്താം ക്ലാസ് വിദ്യാർഥി മരിച്ചു. ഫെലിൻ ഫ്രെഡറിക് (16) ആണ് മരിച്ചത്. ശനിയാഴ്ച രാത്രി 10.50-ഓടെ ചെറുകുന്ന് ചിടങ്ങീലിലായിരുന്നു സംഭവം നടന്നത്. വന്ദേഭാരത് എക്സ്പ്രസ് തട്ടിയാണ് അപകടം ഉണ്ടായത്. കണ്ണൂർ ചെറുകുന്നിലാണ് സംഭവം. ചിടങ്ങീലിലെ അമ്മവീട്ടിൽ താമസിച്ചുവരികയായിരുന്ന ഫെലിൻ, സമീപത്തെ ക്ലബ്ബിന്റെ കലാപരിപാടികൾ കാണാൻ പോയതായിരുന്നു. ഈ വീട്ടിൽ നിന്ന് 250 മീറ്റർ അകലെ വെച്ചായിരുന്നു അപകടം സംഭവിച്ചത്. പരിപാടിക്കിടെ സുഹൃത്തുക്കളോടൊപ്പം ചായ കുടിക്കാനായി ട്രാക്ക് മുറിച്ചുകടക്കുമ്പോൾ മംഗളൂരുവിലേക്ക് പോകുകയായിരുന്ന ട്രെയിൻ തട്ടി മരിക്കുകയായിരുന്നു.
ട്രെയിൻ വരുന്നത് ശ്രദ്ധയിൽപ്പെട്ടില്ലെന്ന് ഒപ്പമുണ്ടായിരുന്നവർ പറഞ്ഞു. അപകടത്തിന്റെ ആഘാതത്തിൽ ഭയന്നുപോയ സുഹൃത്തുക്കൾ അപകട വിവരം ആദ്യ അറിയിക്കാതിരുന്നത് രക്ഷാപ്രവർത്തനം വൈകിപ്പിച്ചു. വണ്ടി വരുന്ന ശബ്ദം കേൾക്കാൻ പറ്റിയില്ല എന്നാണ് കൂട്ടുകാർ പറഞ്ഞത്. ശരീരം മുഴുവൻ ചിന്നിച്ചിതറിയ നിലയിലായിരുന്നു. പിന്നീട് നാട്ടുകാരും കണ്ണപുരം പൊലീസും ചേർന്ന് നടത്തിയ തിരച്ചിലിലാണ് ചിന്നിച്ചിതറിയ നിലയിൽ മൃതദേഹം കണ്ടെത്തിയത്. ചെറുകുന്ന് ഗവ. വെൽഫെയർ ഹയർ സെക്കൻഡറി സ്കൂൾ വിദ്യാർഥിയായ ഫെലിൻ, കട്ടക്കുളം സ്വദേശി കെ.എഫ്. അനീഷിന്റെയും ഷീജയുടെയും മകനാണ്.
