കൊച്ചി: മുഖ്യമന്ത്രിയുടെ അഡീഷണല് പ്രൈവറ്റ് സെക്രട്ടറി സി എം രവീന്ദ്രന് ഇന്ന് ഇഡിക്ക് മുന്നില് ചോദ്യം ചെയ്യലിന് ഹാജരായില്ല. കോവിഡ് രോഗബാധ ഭേദമായ ശേഷമുള്ള ചികിത്സയുടെ ഭാഗമായുള്ള വൈദ്യപരിശോധന നടത്തേണ്ടതിനാല് ഇന്ന് ഹാജരാകാന് അസൗകര്യമുണ്ടെന്ന് രവീന്ദ്രന് അറിയിച്ചതിനെ തുടര്ന്നാണ് മൂന്നാം ദിവസത്തെ ചോദ്യം ചെയ്യല് ഒഴിവായത്. കള്ളപ്പണം വെളുപ്പിക്കല്, ബിനാമി ഇടപാട് കേസുകളില് അന്വേഷണം നേരിടുകയാണ് രവീന്ദ്രന്.
വൈദ്യപരിശോധന മുടക്കാനാകില്ലെന്ന് അറിയിച്ചാണ് രവീന്ദ്രന് ചോദ്യംചെയ്യലില് നിന്ന് ഒഴിവ് തേടിയത്. ഈ ആവശ്യം ഇ.ഡി അനുവദിക്കുകയായിരുന്നു. ഇന്ന് 10 മണിയോടെ കൊച്ചിയിലെ ഇ.ഡി ഓഫീസിലെത്താനായിരുന്നു രവീന്ദ്രനോട് എന്ഫോഴ്സ്മെന്റ് ആവശ്യപ്പെട്ടത്. എന്നാല് ഇന്ന് രാവിലെ ഒന്പതോടെ എത്താന് അസൗകര്യം അറിയിച്ച് രവീന്ദ്രന് ഇ.ഡിക്ക് മെയില് ചെയ്തു. ചോദ്യം ചെയ്യലിന് ഹാജരാകാന് രണ്ട് ദിവസം കൂടി രവീന്ദ്രന് ചോദിച്ചതായാണ് വിവരം.
മുന്പ് രണ്ട് ദിവസം എന്ഫോഴ്സ്മെന്റ് അധികൃതര് സി.എം രവീന്ദ്രനെ ചോദ്യം ചെയ്തിരുന്നു.സ്വര്ണക്കടത്ത് കേസിലെ പ്രതികള് ചോദ്യം ചെയ്യലില് നല്കിയ മൊഴികളും കേസിലെ തെളിവുകളും അടിസ്ഥാനമാക്കിയാണ് രവീന്ദ്രനെ രണ്ട് ദിവസവും ഇ.ഡി ചോദ്യം ചെയ്തത്. ലൈഫ് മിഷന്, വിവിധ സര്ക്കാര് പദ്ധതികള്, ഊരാളുങ്കല് ലേബര് സൊസൈറ്റിക്ക് നല്കിയ പല കരാറുകള്, വിവിധ പദ്ധതികളുമായി ബന്ധമുള്ള നിക്ഷേപകര് ഇവരുമായി ബന്ധപ്പെട്ട വിവരങ്ങളാണ് ചോദ്യം ചെയ്യലിലുണ്ടായിരുന്നത്.
ആദ്യം മൂന്ന് തവണ ചോദ്യം ചെയ്യലിന് ഹാജരാകാന് ആവശ്യപ്പെട്ടെങ്കിലും രവീന്ദ്രന് കോവിഡ് രോഗബാധിതനായതിനാലും തുടര്ന്ന് ചികിത്സയിലായതിനാലും എത്താനാകില്ലെന്ന് അറിയിച്ചിരുന്നു. നാലാം തവണ ഇ.ഡി നോട്ടീസ് നല്കിയ ശേഷമാണ് ചോദ്യം ചെയ്യലിന് ഹാജരായത്. അതേസമയം രവീന്ദ്രനെതിരേ ഇ.ഡി.ക്ക് പുതിയ വിവരങ്ങളൊന്നും ലഭിച്ചില്ലെന്നാണ് സൂചന.
എം. ശിവശങ്കറിനു പുറമേ മുഖ്യമന്ത്രിയുടെ ഓഫീസിലെ മറ്റാരെങ്കിലും ബന്ധപ്പെട്ടിരുന്നോ എന്ന ചോദ്യത്തിന് സി.എം. രവീന്ദ്രന് വിളിക്കാറുണ്ടായിരുന്നെന്നും വിസ സ്റ്റാമ്പിങ്ങും സര്ട്ടിഫിക്കറ്റ് അറ്റസ്റ്റേഷനുമായും ബന്ധപ്പെട്ടായിരുന്നു ഇതെന്നും സ്വപ്ന മൊഴി നല്കിയിരുന്നു. ഇതുതന്നെ വീണ്ടും സ്വപ്ന ആവര്ത്തിക്കുകയായിരുന്നു.
നേരത്തെ സി.എം രവീന്ദ്രന്റെ വിദേശയാത്രകള്, സ്വര്ണക്കടത്തിലും ബിനാമി ഇടപെടലുകളിലും അദ്ദേഹത്തിന് ബന്ധമുണ്ടോ തുടങ്ങിയ കാര്യങ്ങളാണ് ഇ.ഡി ചോദിച്ചറിഞ്ഞതെന്നാണ് പുറത്തുവരുന്ന വിവരം. വിദേശയാത്രകളുടെ രേഖകള് സമര്പ്പിക്കാന് ആവശ്യപ്പെട്ടിരുന്നു. എന്നാല്, ഈ രേഖകളൊന്നും അദ്ദേഹം ഹാജരാക്കിയിരുന്നില്ല. ആരോഗ്യപ്രശ്നങ്ങള് ഉന്നയിച്ചതിനെ തുടര്ന്ന് കൂടുതല് സമയം ഇടവേളകള് നല്കിയാണ് രവീന്ദ്രനെ ചോദ്യം ചെയ്യുന്നത്. ഇ.ഡി. ചോദ്യം ചെയ്യുമ്പോള് അതിന്റെ ദൈര്ഘ്യം പരിമിതപ്പെടുത്താന് നിര്ദേശിക്കണം എന്നാവശ്യപ്പെട്ട് സി.എം. രവീന്ദ്രന് നല്കിയ ഹര്ജി കഴിഞ്ഞ ദിവസം ഹൈക്കോടതി തള്ളിയിരുന്നു.
