തിരുവനന്തപുരം : കോവിഡിനെ തുടര്ന്ന് അടച്ചിട്ട വിദ്യാലയങ്ങള് തിങ്കളാഴ്ച മുതല് വീണ്ടും തുറക്കുകയാണെങ്കിലും ജാഗ്രത വേണമെന്ന് മുഖ്യമന്ത്രി പിണറായി വിജയന്. 18 വയസ്സിനു മുകളിലുള്ള 95 ശതമാനത്തോളം പേര്ക്കും വാക്സിന് നല്കിയതോടെ കോവിഡ് നിയന്ത്രണങ്ങളില് കൂടുതല് ഇളവുകള് നല്കാന് സംസ്ഥാനം പ്രാപ്തമായിട്ടുണ്ടെന്നും മുഖ്യമന്ത്രി സമൂഹമാധ്യമത്തില് കുറിച്ചു.
കോവിഡിന്റെ പശ്ചാത്തലത്തില് ദീര്ഘകാലം അടച്ചിടേണ്ടി വന്ന വിദ്യാലയങ്ങള് നാളെ മുതല് വീണ്ടും തുറന്നു പ്രവര്ത്തിക്കുകയാണ്. അധ്യായനം ഓണ്ലൈന് സംവിധാനങ്ങള് ഉപയോഗിച്ച് മികച്ച രീതിയില് മുന്നോട്ടു കൊണ്ടുപോകാന് സാധിച്ചെങ്കിലും കൂട്ടുകാരുമായി ഒത്തുചേര്ന്ന് പഠിക്കുന്നതിനും കളിക്കുന്നതിനുമൊക്കെ കുട്ടികള്ക്ക് സാധിക്കാതെ പോയത് വിഷമകരമായ കാര്യമായിരുന്നു. മാത്രമല്ല, വിദ്യാലയങ്ങളില് നേരിട്ട് നടക്കേണ്ട വിദ്യാഭ്യാസത്തിന്റെ അഭാവം സൃഷ്ടിച്ചിരുന്ന വെല്ലുവിളികളുമുണ്ടായിരുന്നു. നാളെ മുതല് ആ സ്ഥിതി മാറുകയാണ്.
18 വയസ്സിനു മുകളിലുള്ളവരില് 95 ശതമാനത്തോളം പേര്ക്കും വാക്സിനേഷന് നല്കിയതോടെ സാമൂഹിക നിയന്ത്രണങ്ങളില് കൂടുതല് ഇളവുകള് നല്കാന് സംസ്ഥാനം പ്രാപ്തമായിട്ടുണ്ട്. പുതിയ കേസുകളുടെയും ചികിത്സയിലുള്ള രോഗികളുടെയും എണ്ണം വലിയ തോതില് കുറഞ്ഞു. ഈ സാഹചര്യത്തിലാണ് മികച്ച ജാഗ്രത പുലര്ത്തിക്കൊണ്ട് വിദ്യാലയങ്ങള് തുറന്നു പ്രവര്ത്തിക്കാനുള്ള തീരുമാനമെടുത്തത്. ഒന്നു മുതല് ഏഴു വരെയുളള ക്ലാസ്സുകളും, 10, 12 ക്ലാസ്സുകളും നവംബര് ഒന്നു മുതലും ബാക്കിയുള്ള ക്ലാസ്സുകള് നവംബര് 15 മുതലും ആരംഭിക്കും.
സുരക്ഷിതമായ രീതിയില് വിദ്യാലയങ്ങളുടെ പ്രവര്ത്തനം മുന്നോട്ടു കൊണ്ടുപോവുക എന്നത് അതീവ പ്രധാനമാണ്. അക്കാര്യത്തില് അധ്യാപകരുടെയും രക്ഷിതാക്കളുടെയും പിന്തുണ അനിവാര്യമാണ്. അതിനായി ആരോഗ്യവകുപ്പും വിദ്യാഭ്യാസവകുപ്പും സംയുക്തമായി മറ്റു വകുപ്പുകളുടെ സഹകരണത്തോടെ തയാറാക്കിയ മാര്ഗരേഖ കര്ശനമായി പാലിക്കേണ്ടതുണ്ട്. പ്രധാന നിര്ദേശങ്ങള് വിദ്യാലയങ്ങളിലേക്കും അവിടെനിന്നും രക്ഷിതാക്കളിലേക്കും കൈമാറിയിട്ടുണ്ട്.
സ്കൂളുകളിലെ തിരക്ക് നിയന്ത്രിക്കുന്നതിനും കുട്ടികള്ക്കിടയില് സാമൂഹിക അകലം പാലിക്കപ്പെടുന്നതിനും ക്ലാസ് മുറികളിലെയും പരിസരങ്ങളിലെയും ശുചിത്വം ഉറപ്പു വരുത്തുന്നതിനും ആവശ്യമായ നിര്ദേശങ്ങള് വിദ്യാലയങ്ങള് നടപ്പാക്കും. ഓരോ വിദ്യാലയവും ആരോഗ്യവകുപ്പുമായി സഹകരിച്ചു പ്രവര്ത്തിച്ചുകൊണ്ട് സുരക്ഷാവലയം തീര്ക്കുന്നതിനാവശ്യമായ നടപടികള് കൈക്കൊള്ളും. ഈ പ്രവര്ത്തനങ്ങള് നിരീക്ഷിക്കുന്നതിനും തിരുത്തി ഇടപെടുന്നതിനും ആവശ്യമായ സംവിധാനങ്ങളും സജ്ജമാണ്.
കോവിഡ് തീര്ത്ത പ്രതിസന്ധിയില്നിന്നും നമ്മുടെ നാട് ഉണരുകയാണ്. കൂടുതല് കരുതലോടെയും അതിലേറെ ആവേശത്തോടെയും നാടിന്റെ പുരോഗതിക്കായി നമുക്കൊരുമിച്ചു നില്ക്കാം. വിദ്യാഭ്യാസ സ്ഥാപനങ്ങള് തുറക്കുന്നത് ആ ദിശയിലെ പ്രധാന ചുവടുവയ്പ്പാണ്. അതേറ്റവും മികച്ച രീതിയില് നടപ്പാക്കുന്നതിനായി സമൂഹമൊന്നാകെ പിന്തുണ നല്കണമെന്ന് അഭ്യര്ഥിക്കുന്നു.