തിരുവനന്തപുരം : വാഹന പരിശോധന അടക്കം പോലീസിനൊപ്പം ലോക്ഡൗണ് നിയന്ത്രണ പ്രവര്ത്തനങ്ങളില് പങ്കെടുക്കാന് ഒരു സന്നദ്ധ സംഘടനയ്ക്കും അനുമതിയില്ലെന്ന് മുഖ്യമന്ത്രി പിണറായി വിജയന്. ഒരു സന്നദ്ധ സംഘടനയ്ക്കും ഔദ്യോഗിക സംവിധാനത്തിനൊപ്പം നിന്ന് പ്രവര്ത്തിക്കാനുള്ള അനുമതിയില്ല. ചിലയിടങ്ങളില് പോലീസിനൊപ്പം സേവാഭാരതി പ്രവര്ത്തകര് സംഘടനയുടെ പേരുള്ള ടീഷര്ട്ടുമണിഞ്ഞ് വാഹനങ്ങള് പരിശോധിക്കുന്നതായുള്ള പരാതി ചൂണ്ടിക്കാട്ടിയപ്പോഴായിരുന്നു മുഖ്യമന്ത്രിയുടെ വിശദീകരണം.
സംഘടനകള് ധാരാളമുണ്ട്. സര്ക്കാര് തന്നെ സന്നദ്ധ പ്രവര്ത്തകരുടെ സേന രൂപവത്കരിച്ചിട്ടുണ്ട്. അതിലെ അംഗങ്ങള്ക്കാണ് ഇത്തരം കാര്യങ്ങളില് പങ്കെടുക്കാനുള്ള അനുമതി. അവര്ക്ക് ഏതെങ്കിലും രാഷ്ട്രീയ ബന്ധമോ സന്നദ്ധ സംഘടനയുമായുള്ള ബന്ധമോ ഉണ്ടെങ്കില് അതൊന്നും പ്രദര്ശിപ്പിച്ചുകൊണ്ട് ഇത്തരം പ്രവര്ത്തനത്തില് പങ്കാളിത്തം വഹിക്കാനാവില്ല.
അതോടൊപ്പം പോലീസ് വിവിധ സ്ഥലങ്ങളില് തങ്ങള്ക്കൊപ്പം പ്രവര്ത്തിക്കാനുള്ള വളണ്ടിയര്മാരെ നിയോഗിച്ചിട്ടുണ്ട്. അത് ഏതെങ്കിലും സന്നദ്ധ സേനയില് പെട്ട ആളുകളല്ല, സമൂഹത്തില് പ്രവര്ത്തിക്കാന് മുന്നോട്ടുവരുന്ന ആളുകളാണ്. അത്തരത്തിലുള്ള കാര്യങ്ങള് പ്രോത്സാഹിപ്പിക്കില്ലെന്നും മുഖ്യമന്ത്രി പറഞ്ഞു.
