തിരുവനന്തപുരം : തദ്ദേശ തെരഞ്ഞെടുപ്പിനുള്ള സമ്പൂര്ണ്ണ വോട്ടര് പട്ടിക ഇന്ന് പ്രസിദ്ധീകരിക്കും. ഇന്നു അര്ധരാത്രി മുതല് സംസ്ഥാനത്തെ തദ്ദേശ സ്ഥാപനങ്ങളില് ഉദ്യോഗസ്ഥ ഭരണവും നിലവില് വരും. നാളെ തെരഞ്ഞെടുപ്പ് വിജ്ഞാപനം നിലവില് വരുന്നതോടെ നാമനിര്ദേശ പത്രികാ സമര്പ്പണം ആരംഭിക്കും. അടുത്ത വ്യാഴാഴ്ച വരെയാണ് പത്രിക നല്കാവുന്നത്.
വെള്ളിയാഴ്ച സൂക്ഷമ പരിശോധന നടക്കും. നവംബര് 23 തിങ്കളാഴ്ചയാണ് പിന്വലിക്കാനുള്ള അവസാന തീയതി. മൂന്ന് ഘട്ടമായാണ് വോട്ടെടുപ്പ്. അടുത്തമാസം 8,10, 14 തീയതികളിലാണ് വോട്ടെടുപ്പ് നടക്കുന്നത്. ഫലപ്രഖ്യാപനം ഡിസംബര് 16നാണ്. അന്തിമ വോട്ടര് പട്ടിക ഒക്ടോബര് ഒന്നിനു പ്രസിദ്ധീകരിച്ചിരുന്നു. അതിനു ശേഷം പട്ടികയില് പേരില്ലാത്തവര്ക്ക് ഒരവസരം കൂടി നല്കി.
പുതുതായി ചേര്ത്ത പേരുകള് കൂടി ഉള്പ്പെടുത്തിയാണ് അന്തിമ വോട്ടര്പട്ടിക പ്രസിദ്ധീകരിക്കുന്നത്. ഇനി വോട്ടര്പട്ടികയില് പേര് ചേര്ക്കാന് അവസരം കിട്ടില്ല. സംവരണ മണ്ഡലങ്ങളില് മാറ്റം വരുത്തണമെന്ന് കോടതി നിര്ദ്ദേശിച്ച സ്ഥലങ്ങളില് ഇന്ന് നറുക്കെടുപ്പ് നടക്കും. പാലാ കോതമംഗലം മലപ്പുറം മുന്സിപ്പാലിറ്റികളിലും 5 ഗ്രമാപഞ്ചായത്തുകളും രണ്ട് ബ്ലോക്ക് പഞ്ചായത്തുകളിലുമാണ് മാറ്റം.