ദില്ലി: മോദി സര്‍ക്കാരിന് ജാതി വിവേചനമെന്ന് തമിഴ്‌നാട് കോണ്‍ഗ്രസ് നേതാവ് മോഹന്‍ കുമാരമംഗലം. കോണ്‍ഗ്രസ് അധ്യക്ഷനും ദളിത് നേതാവുമായ മല്ലികാര്‍ജുന്‍ ഖാര്‍ഗെയെ, ജി 20 ഉച്ചക്കോടിയുടെ ഭാഗമായുളള അത്താഴവിരുന്നിനുളള പട്ടികയില്‍ നിന്ന് ഒഴിവാക്കിയതിന് പിന്നാലെയാണ് അദ്ദേഹത്തിന്റെ പ്രതികരണം. ഹിന്ദുത്വ ആശയങ്ങളുടെ വഴികാട്ടി എന്ന് പലപ്പോഴും വിശേഷിപ്പിക്കപ്പെടുന്ന പുരാതന സംസ്‌കൃത ഗ്രന്ഥമായ മനുസ്മൃതി രചിച്ച മഹര്‍ഷി മനുവിന്റെ പാരമ്പര്യമാണ് പ്രധാനമന്ത്രി മോദി ഉയര്‍ത്തിപ്പിടിക്കുന്നതെന്നും കുമാരമംഗലം പറഞ്ഞു.
ജാതി അടിസ്ഥാനത്തിലുള്ള വിവേചനം പ്രോത്സാഹിപ്പിക്കുന്നതിനാല്‍ നിരവധി പണ്ഡിതന്മാരാല്‍ വിമര്‍ശിക്കപ്പെട്ടിട്ടുളള ഗ്രന്ഥമാണിത്. പ്രധാനപ്പെട്ട പരിപാടികളിലേക്ക് പിന്നാക്ക വിഭാഗങ്ങളില്‍ നിന്നുള്ള നേതാക്കളെ ക്ഷണിക്കാത്ത മുന്‍കാല സംഭവങ്ങളെയും കുമാരമംഗലം പരാമര്‍ശിച്ചു. അയോധ്യയിലെ രാമക്ഷേത്രത്തിന്റെ ‘ഭൂമി പൂജ’യിലേക്ക് മുന്‍ രാഷ്ട്രപതി രാംനാഥ് കോവിന്ദിനെ ക്ഷണിച്ചിരുന്നില്ല, അതുപോലെ പുതിയ പാര്‍ലമെന്റ് മന്ദിരത്തിന്റെ ഉദ്ഘാടന ചടങ്ങിലേക്ക് രാഷ്ട്രപതി ദ്രൗപതി മുര്‍മുവിനെയും ക്ഷണിച്ചിട്ടില്ലെന്നും അദ്ദേഹം പറഞ്ഞു.
