വെച്ചൂച്ചിറ : പരുവ മഹാദേവക്ഷേത്രത്തിലെ പ്രതിഷ്ഠാ വാർഷികവും ദേവീഭാഗവത നവാഹ സത്രവും ഏപ്രിൽ 21 മുതൽ 30 വരെ നടക്കും. 21-ന് യജ്ഞം ആരംഭിക്കും. രാവിലെ 10-ന് മലയാലപ്പുഴ ക്ഷേത്രം തന്ത്രി യജ്ഞവേദിയിൽ പ്രതിഷ്ഠിക്കുന്നതിനുള്ള വിഗ്രഹം 20-ന് മലയാലപ്പുഴ ദേവീക്ഷേത്രത്തിൽനിന്നും രഥഘോഷയാത്രയായി എത്തിക്കും. രാവിലെ 10-ന് മലയാലപ്പുഴ ക്ഷേത്രം തന്ത്രി അടിമുറ്റത്ത്മഠം സുരേഷ് ഭട്ടതിരി ഘോഷയാത്ര ഉദ്ഘാടനം ചെയ്യും. സത്ര സമാരംഭസഭയും ഭദ്രദീപ പ്രതിഷ്ഠയും 21-ന് രാവിലെ 9.30-ന് നടക്കും. വിശ്വഹിന്ദു പരിഷത്ത് സംസ്ഥാന പ്രസിഡന്റ് വിജി തമ്പി സത്രവേദിയിൽ ഭദ്രദീപം തെളിയിക്കും. സമാരംഭ സഭയിൽ ക്ഷേത്രഭരണസമിതി പ്രസിഡന്റ് എസ്. സോനു അധ്യക്ഷത വഹിക്കും. ആന്റോ ആന്റണി എംപി, പ്രമോദ് നാരായൺ എംഎൽഎ എന്നിവർ പങ്കെടുക്കും.
പ്രതിഷ്ഠാ വാർഷികം ഏപ്രിൽ 30-ന് ക്ഷേത്രം തന്ത്രി പുത്തില്ലം നാരായണൻ നമ്പൂതിരിയുടെ മുഖ്യകാർമികത്വത്തിൽ നടക്കും. പള്ളിക്കൽ സുനിലാണ് യജ്ഞാചാര്യൻ. യജ്ഞദിവസങ്ങളിൽ രാവിലെ ഏഴിന് സമൂഹലളിതാസഹസ്രനാമജപം, സമൂഹ വിഷ്ണുസഹസ്രനാമജപം, 8.30-ന് ദേവീഭാഗവതപാരായണം, ഒന്നിന് പ്രസാദമൂട്ട്, വൈകിട്ട് 5.30-ന് നവാക്ഷരിഹോമം, ദീപാരാധനയ്ക്കുശേഷം ഭജന, പ്രഭാഷണം, അഞ്ച്, ആറ്, ഏഴ് ഉത്സവദിവസങ്ങളിൽ 10.30-ന് മൃത്യുഞ്ജയഹോമം എന്നിവ ഉണ്ടായിരിക്കും. 21-ന് രാത്രി ഏഴിന് തിരുവാതിര. 22-ന് പകൽ 12.15-ന് നടക്കുന്ന ആയുർവേദ സദസ്സിൽ ജില്ലാ ആയുർവേദ ആശുപത്രിയിലെ സീനിയർ മെഡിക്കൽ ഓഫീസർ ഡോ.എൻ.വിനോദ് ക്ലാസെടുക്കും. 23-ന് പകൽ 12-ന് നടക്കുന്ന ലഹരിവിരുദ്ധസദസ്സിൽ എസ്‌ഐ എ.ആർ. രവീന്ദ്രൻ ക്ലാസെടുക്കും. 24-ന് 12.30-ന് നടക്കുന്ന ഗുരുവന്ദനം പരിപാടി മികച്ച പോളിടെക്‌നിക് കോളേജ് അധ്യാപക അവാർഡ് ജേതാവ് സി.എ.അജിമോൻ ഉദ്ഘാടനം ചെയ്യും. 25-ന് പകൽ 12.15-ന് വിജ്ഞാനസദസ്സ്, രാത്രി എട്ടിന് ഭക്തിഗാനസുധ, 27-ന് പകൽ 12-ന് നടക്കുന്ന ആചാര്യസദസ്സ് ശബരിമല മുൻ മേൽശാന്തി എസ്.ഇ. ശങ്കരൻ നമ്പൂതിരി ഉദ്ഘാടനം ചെയ്യും.
അഞ്ചിന് സർവ്വൈശ്വര്യപൂജ. 28-ന് പകൽ 12.15-ന് നടക്കുന്ന നിയമബോധന ക്ലാസിൽ അഭിഭാഷകരായ ഗോപിക ഗോപിനാഥ്, ഐശ്വര്യ ആർ. നായർ എന്നിവർ ക്ലാസെടുക്കും. അഞ്ചിന് വിദ്യാഗോപാലമന്ത്രാർച്ചന, യജ്ഞസമാപന ദിവസമായ 29-ന് പകൽ 12.45-ന് അവഭൃഥസ്‌നാന ഘോഷയാത്ര, വൈകിട്ട് അഞ്ചിന് സർവ്വൈശ്വര്യപൂജ, 6.30-ന് മുതിർന്നവരെ ആദരിക്കൽ എന്നിവ നടക്കും. 30-ന് രാവിലെ കലശ-കളഭ പൂജകൾ, കലശാഭിഷേകം തുടങ്ങിയ പ്രതിഷ്ഠാദിന പൂജകൾ നടക്കും. സത്രസമംഗളസഭ ശാന്തിഗിരി ആശ്രമം ജനറൽ സെക്രട്ടറി ഗുരുരത്‌നം ജ്ഞാനതപസ്വി ഉദ്ഘാടനംചെയ്യും. ക്ഷേത്രം തന്ത്രി പുത്തില്ലം നാരായണൻ നമ്പൂതിരി അനുഗ്രഹ പ്രഭാഷണം നടത്തും.
