തിരുവനന്തപുരം; സംസ്ഥാനത്ത് ഇന്ന് 20 പേര്‍ക്ക് കൂടി കൊറോണ വൈറസ് ബാധ സ്ഥിരീകരിച്ചു. രോഗ ബാധ സ്ഥിരീകരിച്ചവരില്‍ 18 പേരും വിദേശത്ത് നിന്നുമെത്തിയവരാണ്. കണ്ണൂര്‍ 8, കാസര്‍കോട് 7, തിരുവനന്തപുരം 1, എറണാകുളം 1, തൃശൂര്‍ 1, പാലക്കാട് 1, മലപ്പുറം 1 എന്നീ ജില്ലകളിലാണ് ഇന്ന് കൊറോണ സ്ഥിരീകരിച്ചിരിക്കുന്നത്. രണ്ട് പേര്‍ക്ക് സമ്പര്‍ക്കത്തിലൂടെയാണ് കൊറോണ ബാധിച്ചത്. സംസ്ഥാനത്ത് വിവിധ ജില്ലകളിലായി 1,41,211 പേരാണ് നിരീക്ഷണത്തില്‍ കഴിയുന്നത്. 181 പേരാണ് സംസ്ഥാനത്ത് ചികിത്സയിലുള്ളത്.
തിരുവനന്തപുരം ജില്ലയില്‍ രോഗം സ്ഥിരീകരിച്ചയാള്‍ തിരുവനന്തപുരം മെഡിക്കല്‍ കോളേജില്‍ ഐസൊലേഷന്‍ ഐ.സി.യു.വില്‍ ചികിത്സയിലാണെന്നും ആരോഗ്യ മന്ത്രി കെ കെ ശൈലജ അറിയിച്ചു. രോഗലക്ഷണങ്ങള്‍ ഉള്ള 6690 വ്യക്തികളുടെ സാമ്പിള്‍ പരിശോധനയ്ക്ക് അയച്ചു. ഇതില്‍ 5518 സാമ്പിളുകളുടെ പരിശോധനാ ഫലവും നെഗറ്റീവ് ആണ്. എറണാകുളം ജില്ലയില്‍ ഇന്ന് രോഗബാധ സ്ഥിരീകരിച്ചത് ആരോഗ്യ പ്രവര്‍ത്തകനാണ്. അതേസമയം പത്തനംതിട്ട ജില്ലയില്‍ ചികിത്സയിലുണ്ടായിരുന്ന നാല് പേരുടെയും പരിശോധന ഫലം നെഗറ്റീവ് ആണ്.
