അബുദാബി : ഗള്‍ഫില്‍ കൊവിഡ് ബാധിച്ച് അഞ്ച് മലയാളികള്‍ കൂടി മരിച്ചു. ഇതോടെ ഗള്‍ഫില്‍ മരിച്ച മലയാളികളുടെ എണ്ണം 44 ആയി. മലപ്പൂറം തിരൂര്‍ കൈനിക്കര അഷ്റഫ്, പത്തനംതിട്ട നെല്ലിക്കാല റോഷന്‍, കോതമംഗലം ആയക്കാട് തൈക്കാവ് പടി ഏലവും ചാലില്‍ നിസാര്‍, ചൈവക്കാട് എടക്കഴിയൂര്‍ നാലാം കല്ല് കറുപ്പം വീട്ടില്‍ മുഹമ്മദ് ഹനീഫ, തിരൂര്‍ താനൂരിലെ കമാലൂദ്ദീന്‍ കുളത്തുവീട്ടില്‍ എന്നിവരാണ് മരിച്ചത്.
അജ്‍മാനില്‍ താമസിക്കുന്ന നിസാറിന് രോഗം ബാധിച്ചത് കൊവിഡ് ബാധിതനായ സുഹൃത്തിനെ ആശുപത്രിയില്‍ സന്ദര്‍ശിച്ചപ്പോഴാണ്. രണ്ട് ദിവസമായി അജ്‍മാനിലെ ആശുപത്രിയില്‍ ചികിത്സയിലായിരുന്നു. തിരൂർ സ്വദേശി അഷ്റഫ് അബുദാബിയിലാണ് മരിച്ചത്. സൂപ്പര്‍മാര്‍ക്കറ്റ് ഉടമയാണ്. റോഷനും അബുദാബിയിലാണ് മരിച്ചത്. ഏതാനും ദിവസമായി ആശുപത്രിയിലായിരുന്നു. പിനി ബാധിച്ച് ആശുപത്രിയില്‍ പ്രവേശിച്ചപ്പോഴാണ് മുഹമ്മദ് ഹനീഫിന് കൊവിഡ് ബാധിച്ചതായി കണ്ടെത്തിയത്.
ദുബായിലാണ് താനൂര്‍ സ്വദേശി കമാലുദ്ദീന്‍ മരിച്ചത്. കൊവിഡ് സ്ഥിരീകരിച്ചതിനെ തുടര്‍ന്ന് ദുബായ് അല്‍ ബറാഹ ആശുപത്രിയില്‍ ചികിത്സയിലായിരുന്നു. ഷാര്‍ദ കെഎംസിസിയുെട സജീവ പ്രവര്‍ത്തകനായിരുന്നു. യുഎഇയിലാണ് ഏറ്റവും കൂടുതല്‍ മലയാളികള്‍ കൊവിഡ് ബാധിച്ച് മരിച്ചത്. കഴിഞ്ഞ 24 മണിക്കൂറിനിടെ നാല് മലയാളികളാണ് യുഎഇയില്‍ മരിച്ചത്.
തൊഴിലാളി ക്യാമ്പുകളില്‍ ഉള്‍പ്പെടെ രോഗബാധിതര്‍ക്കൊപ്പം താമസിക്കേണ്ടി വരുന്നതിനാല്‍ മലയാളികള്‍ ഉള്‍പ്പെടെയുള്ള പ്രവാസികള്‍ ആശങ്കയിലാണ്. നാട്ടിലേക്ക് മടങ്ങാനായി ഇന്ത്യന്‍ എമ്പസികള്‍ വഴി രജിസ്റ്റര്‍ ചെയ്‍ത് കാത്തിരിക്കുകയാണ് പ്രവാസികളില്‍ ഭൂരിഭാഗവും. യുഎഇയില്‍ രണ്ട് ലക്ഷത്തോളം ആളുകളാണ് രജിസ്റ്റര്‍ ചെയ്‍തിരിക്കുന്നത്. കേന്ദ്ര സര്‍ക്കാര്‍ വിമാന സര്‍വീസ് പ്രഖ്യാപിച്ചാല്‍ മാത്രമെ ഇവര്‍ക്ക് മടങ്ങാനാകു.
