ന്യൂഡല്‍ഹി: രാജ്യത്ത് ഒരു ലക്ഷം കടന്ന് പ്രതിദിന കോവിഡ് കേസുകള്‍. 24 മണിക്കൂറിനിടെ 1,03,558 പേര്‍ക്കാണ് പുതുതായി രോഗം സ്ഥിരീകരിച്ചതെന്ന് ആരോ ഗ്യമന്ത്രാലയം അറിയിച്ചു.
രാജ്യത്ത് മഹാമാരി തുടങ്ങിയതിന് ശേഷം റിപ്പോര്‍ട്ട് ചെയ്യുന്ന ഏറ്റവും ഉയര്‍ന്ന നിരക്കാണിത്. 52,847 പേര്‍ രോഗമുക്തി നേടി. 24 മണിക്കൂറിനിടെ 478 മരണം കോവിഡ് മൂലമാണെന്ന് സ്ഥിരീകരിച്ചു. 1,25,89,067 പേര്‍ക്കാണ് രാജ്യത്ത് ഇതുവരെ കോവിഡ് സ്ഥിരീകരിച്ചത്. ഇതില്‍ 7,41,830 പേരാണ് നിലവില്‍ ചികിത്സയിലുള്ളത്. 1,16,82,136 പേര്‍ രോഗുമുക്തിയപ്പോള്‍ 1,65,101 പേര്‍ക്ക് കോവിഡ് മൂലം ജീവന്‍ നഷ്ടപ്പെട്ടു.
7,91,05,163 പേരാണ് രാജ്യത്ത് ഇതുവരെ വാക്സിന്‍ സ്വീകരിച്ചത്. കോവിഡ് വാക്സിനേഷന്‍റെ മൂന്നാംഘട്ടമാണ് രാജ്യത്ത് ഇപ്പോള്‍ പുരോഗമിക്കുന്നത്. കോവിഡ് പടര്‍ന്നുപിടിക്കുന്ന മഹാരാഷ്ട്ര, പഞ്ചാബ്, ഛത്തീസ്ഗഡ് എന്നീ സംസ്ഥാനങ്ങളില്‍ കേന്ദ്രസംഘമെത്തും. 10 സംസ്ഥാനങ്ങളില്‍ കോവിഡ് ബാധിതരുടെ എണ്ണം ഉയരുന്ന സാഹചര്യത്തില്‍ പ്രധാനമന്ത്രിയുടെ ഓഫീസ് അറിയിച്ചതാണ് ഇക്കാര്യം.
പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ കാബിനറ്റ് സെക്രട്ടറി, പ്രിന്‍സിപ്പല്‍ സെക്രട്ടറി തുടങ്ങി ഉന്നതതല ഉദ്യോഗസ്ഥര്‍ പങ്കെടുത്ത യോഗം ഞായറാഴ്ച നടന്നിരുന്നു. കോവിഡ് മാനദണ്ഡങ്ങള്‍ പാലിക്കാതിരിക്കുന്നതും മാസ്കും സാമൂഹിക അകലവും പാലിക്കാത്തതുമാണ് കോവിഡ് ബാധിതരുടെ എണ്ണം ഉയരാന്‍ കാരണമെന്നാണ് വിലയിരുത്തല്‍.
മഹാരാഷ്ട്രയില്‍ സ്ഥിതി ഗുരുതരമാണെന്നാണ് വിലയിരുത്തല്‍. രാജ്യത്ത് ഏറ്റവും കൂടുതല്‍ കോവിഡ് ബാധിതര്‍ മഹാരാഷ്ട്രയിലാണ്. കഴിഞ്ഞദിവസം മുതല്‍ സംസ്ഥാനത്ത് നിയന്ത്രണങ്ങള്‍ കര്‍ശനമാക്കുകയും രാത്രികാല കര്‍ഫ്യൂ ഏര്‍പ്പെടുത്തുകയും ചെയ്തിരുന്നു. രാജ്യത്ത് റിപ്പോര്‍ട്ട് ചെയ്യുന്നതില്‍ 57 ശതമാനവും മഹാരാഷ്ട്രയിലാണ്. മരണനിരക്കില്‍ 47 ശതമാനവും മഹാരാഷ്ട്രയിലാണെന്ന് 14ദിവസത്തെ കണക്കുകള്‍ വ്യക്തമാക്കുന്നു. മഹാരാഷ്ട്രക്ക് പുറമെ പഞ്ചാബിലാണ് ഏറ്റവും കൂടുതല്‍ രോഗബാധിതര്‍. രാജ്യത്ത് റിപ്പോര്‍ട്ട് ചെയ്യുന്ന കേസുകളില്‍ 4.5ശതമാനവും പഞ്ചാബിലാണ്.
