തിരുവനന്തപുരം : കോവിഡ് ബാധിച്ചാണ് അമ്മ മരിച്ചതെന്ന വിവരം മറച്ചുവെച്ച് മൃതദേഹം ഡല്ഹിയില് നിന്നും നാട്ടിലെത്തിച്ച് സംസ്കരിച്ചതില് മുന് കേന്ദ്രമന്ത്രി അല്ഫോണ്സ് കണ്ണന്താനത്തിനെതിരെ ഗുരുതര ആരോപണം. ഫെയ്സ് ബുക്ക് പോസ്റ്റിലൂടെയാണ് ജോമോന് പുത്തന്പുരക്കല് ആരോപണവുമായി രംഗത്തെത്തിയിരിക്കുന്നത്. ഡല്ഹിയില് വെച്ച് കോവിഡ് ബാധിച്ച് മരിച്ചയൊരാളെ കോവിഡ് പ്രോട്ടോക്കോള് പ്രകാരം വിമാനമാര്ഗം കേരളത്തിലെത്തിച്ച് മൃതദേഹം പൊതുദര്ശനത്തിന് വെച്ച് സംസ്കാരം നടത്തിയത് തന്നെ അത്ഭുതപ്പെടുത്തിയിരിക്കുകയാണെന്നും ജോമോന് പുത്തന്പുരക്കല് ഫെയ്സ്ബുക്ക് പോസ്റ്റില് വ്യക്തമാക്കുന്നു.
ഫെയ്സ്ബുക്ക് പോസ്റ്റിന്റെ പൂര്ണരൂപം
ബിജെപി നേതാവും മുന് കേന്ദ്രമന്ത്രിയുംഎം.പിയുമായ അല്ഫോന്സ് കണ്ണന്താനത്തിന്റെ അമ്മ കോവിഡ്-19 ബാധിച്ചാണ് മരിച്ചതെന്ന വിവരം വീഡിയോയിലൂടെ അല്ഫോന്സ് കണ്ണന്താനം തന്നെ ഇപ്പോള് വെളിപ്പെടുത്തിയത് ഞെട്ടിപ്പിക്കുന്നതാണ്. 2020 ജൂണ് 10 ന് ഡല്ഹിയിലെ ആശുപത്രിയില് വെച്ചാണ് കണ്ണന്താനത്തിന്റെ അമ്മ മരിച്ചത്.
അതിന് തൊട്ട്മുമ്പ് കുറെ നാളുകളായി കണ്ണന്താനത്തോടൊപ്പം ഡല്ഹിയിലെ ഔദ്യോഗിക വസതിയിലാണ് അമ്മ താമസിച്ചിരുന്നത്. അന്ന് മരണവിവരം അറിയിച്ചുകൊണ്ടുള്ള വാര്ത്ത, ചാനലുകളിലും പത്രത്തിലും ഔദ്യോഗികമായി അറിയിച്ചപ്പോള് കോവിഡ് ബാധിച്ചാണ് അമ്മ മരിച്ചതെന്ന് ഒരിടത്തുപോലും പറഞ്ഞിട്ടേയില്ലായിരുന്നു.
2020 ജൂണ് 14 ന് ഞായറാഴ്ചയാണ് കണ്ണന്താനത്തിന്റെ സ്വദേശമായ കോട്ടയം ജില്ലയിലെ മണിമലയില് വീട്ടിലും പള്ളിയിലും മൃതദേഹം പൊതുദര്ശനത്തിന് വെച്ചശേഷം സംസ്കാരം നടത്തിയത്. അന്ന് ഈ സംസ്കാര ചടങ്ങില് തിരുവനന്തപുരത്ത് നിന്ന് ഞാന് മണിമലയില് പോയി പങ്കെടുത്തിരുന്നു. കണ്ണന്താനത്തിന്റെ അമ്മ കോവിഡ് ബാധിച്ചാണ് മരിച്ചതെന്ന രഹസ്യ സംസാരം അന്നേ ഉണ്ടായിരുന്നു.
കോവിഡ് ബാധിച്ച് മരിച്ച ഒരാളുടെ മൃതദേഹം എംബാം ചെയ്ത് വിമാനമാര്ഗം ഡല്ഹിയില് നിന്ന് കേരളത്തിലേക്ക് കൊണ്ടുവരാന് കേന്ദ്രത്തില് എത്ര സ്വാധീനമുണ്ടെങ്കിലും അസാധ്യമാണെന്ന് ബിജെപിയുടെ ഒരു സംസ്ഥാന ജനറല് സെക്രട്ടറി എന്നോട് അവിടെവച്ച് അപ്പോള് തന്നെ പറഞ്ഞിരുന്നു. ഡല്ഹിയില് വെച്ച് കോവിഡ് ബാധിച്ച് മരിച്ചയൊരാളുടെ മൃതദേഹം കോവിഡ് പ്രോട്ടോക്കോള് പ്രകാരം വിമാനമാര്ഗം കേരളത്തിലെത്തിച്ച് പൊതുദര്ശനത്തിന് വെച്ച് സംസ്കാരം നടത്തിയത് എന്നെ അത്ഭുതപ്പെടുത്തിയിരിക്കുകയാണ്.
ഇന്ത്യയില് കോവിഡ് ബാധിച്ച് മരിച്ച ഒരാളെ ഇത്തരത്തില് ഒരു സംസ്കാരം നടത്തിയ ചരിത്രം ഉണ്ടായിട്ടില്ല. കണ്ണന്താനത്തിന്റെ അമ്മയുടെ ഓര്മയില് ‘മദേര്സ് മീല്’ എന്ന ചാരിറ്റിയുടെ പേരില് കോവിഡിന്റെ പശ്ചാത്തലത്തില് ആഹാരത്തിനായി ബുദ്ധിമുട്ടനുഭവിക്കുന്ന പത്ത് ലക്ഷം പേര്ക്ക് ഒരു വര്ഷത്തിനുള്ളില് ഭക്ഷണം കൊടുക്കണമെന്ന് വിശദീകരിക്കുന്ന വീഡിയോയില് കൂടിയാണ്, കണ്ണന്താനത്തിന്റെ അമ്മ കോവിഡ് ബാധിച്ചാണ് മരിച്ചതെന്ന ഞെട്ടിപ്പിക്കുന്ന വിവരം അല്ഫോന്സ് കണ്ണന്താനം തന്നെ വെളിപ്പെടുത്തിയത്.
