ദുബായ് : കോവിഡ് ബാധിച്ച് കോഴിക്കോട് സ്വദേശി ദുബായില്‍ മരണപ്പെട്ടു. എകരൂല്‍ ഉണ്ണികുളം വള്ളിയോത്ത് കുറുപ്പറുകണ്ടി അബ്ദുല്ലയുടെ മകന്‍ സുബൈര്‍ (35) ദുബായില്‍ മരിച്ചത്‌. കോവിഡ് ബാധിച്ചതിനെ തുടര്‍ന്ന് മൂന്നു മാസമായി ദുബായിലെ വിവിധ ആശുപത്രികളില്‍ ചികിത്സയിലായിരുന്നു.
എന്നാല്‍, കഴിഞ്ഞ രണ്ടു മാസത്തിനിടെ നടത്തിയ പരിശോധനഫലങ്ങളെല്ലാം നെഗറ്റീവായിരുന്നു. ചൊവ്വാഴ്ച രാത്രിയാണ് മരണം. ശ്വാസതടസ്സത്തെ തുടര്‍ന്ന് ഏപ്രില്‍ 28ന് ദുബായ് ആസ്റ്റര്‍ ആശുപത്രിയില്‍ പ്രവേശിപ്പിച്ചെങ്കിലും കോവിഡ് പരിശോധനഫലം പോസിറ്റീവ് ആയതിനെ തുടര്‍ന്ന് അമേരിക്കന്‍ ആശുപത്രിയിലേക്കു മാറ്റുകയായിരുന്നു.
കോവിഡ് പ്രോട്ടോകോള്‍ അനുസരിച്ച്‌ ദുബായ് സോനാപൂര്‍ ഖബര്‍സ്ഥാനില്‍ ഖബറടക്കി. ദുബായിലുള്ള സഹോദരന്‍ മുനീറിന്റെയും അഷ്‌റഫ്‌ താമരശ്ശേരിയുടെയും നേതൃത്വത്തിലായിരുന്നു ഖബറടക്കം. അമേരിക്കന്‍ ആശുപത്രിയിലെ ഡോ.ബാലു ഭാസ്കറായിരുന്നു ചികിത്സാ സഹായങ്ങള്‍ ചെയ്തിരുന്നത്. മാതാവ്‌: സുബൈദ. ഭാര്യ: തഹാന തസ്നി (വാളൂര്‍). മക്കള്‍: മുഹമ്മദ്‌ അസീം, മുഹമ്മദ്‌ ആമിര്‍, ഫൈസാന്‍. സഹോദരങ്ങള്‍: മുനീര്‍ (ദുബൈ), സഫീര്‍.
