കോഴിക്കോട് : കോവിഡ് മരണക്കണക്കുകളിലെ ഒളിച്ചുകളി ജില്ലയിലും നിരവധി കുടുംബങ്ങള്ക്ക് അര്ഹതപ്പെട്ട നഷ്ടപരിഹാരം ഇല്ലാതാക്കുന്നു. മെഡിക്കല് കോളജ് ആശുപത്രിയില് മാത്രം ജനുവരി മുതല് ആറുമാസത്തില് 1573 കോവിഡ് മരണം രേഖപ്പെടുത്തിയിരുന്നു. സ്വകാര്യ ആശുപത്രികളിലും മറ്റ് സര്ക്കാര് ആശുപത്രികളിലും കോവിഡ് ബാധിച്ചു മരിച്ചവരുടെ എണ്ണം കണക്കാക്കിയാല് ഇനിയും കൂടും.
എന്നാല് ആരോഗ്യ വകുപ്പിന്റെ ഔദ്യോഗിക കണക്കില് ഇതുവരെ ജില്ലയില് 1296 പേര് മാത്രമാണ് കോവിഡ് ബാധിച്ചു മരിച്ചത്. ആറു മാസത്തെ മെഡിക്കല് കോളജിലെ കണക്കിനേക്കാള് കുറവാണ് ഒന്നര വര്ഷത്തെ ആരോഗ്യ വകുപ്പിന്റെ കണക്കെന്ന് ചുരുക്കം. മരണ നിരക്ക് കുറച്ച് കാണിക്കുന്നതിനായി അധികൃതര് നടത്തിയ കളിയാണ് മരണങ്ങള് പട്ടികയില് ഉള്പ്പെടാതെ പോയത്.
ഇതുമൂലം മരിച്ചവരുടെ കുടുംബാംഗങ്ങള്ക്ക് ലഭിക്കേണ്ട അര്ഹതപ്പെട്ട ആനുകൂല്യങ്ങളാണ് നഷ്ടമാവുക. കണക്കുകള് കുറേക്കൂടി കൃത്യമായി രേഖപ്പെടുത്താന് തുടങ്ങിയതു തന്നെ കോവിഡ് ബാധിച്ചു മരിച്ച രക്ഷിതാക്കളുടെ മക്കള്ക്ക് സര്ക്കാര് സഹായം പ്രഖ്യാപിച്ചതോടെയാണ്. അപ്പോഴും കണക്കുകളില് പൊരുത്തക്കേടുകള് കാണുന്നുണ്ട്.
കഴിഞ്ഞ പത്ത് ദിവസം മെഡിക്കല് കോളജില് മാത്രം 71 കോവിഡ് മരണമാണ് റിപ്പോര്ട്ട് ചെയ്തത്. ആരോഗ്യ വകുപ്പിന്റെ ഔദ്യോഗിക കണക്കില് ഇത് 104 ആണ്. മെഡിക്കല് കോളജില് ജൂണ് 21ന് 14 പേരുടെ മരണം രേഖപ്പെടുത്തിയിട്ടുണ്ട്. എന്നാല് ആരോഗ്യ വകുപ്പിന്റെ കണക്കില് 11 മാത്രമാണ്. 22ന് പത്ത് മരണം മെഡിക്കല് കോളജില് രേഖപ്പെടുത്തിയപ്പോള് ഔദ്യോഗിക കണക്കില് എട്ടെണ്ണം മാത്രമാണുള്ളത്.
ആരോഗ്യ വകുപ്പില് രേഖപ്പെടുത്തുന്ന മരണങ്ങള് ജില്ലയിലെ എല്ലാ ആശുപത്രികളിലുമായി നടന്നതാണ് എന്നിരിക്കെ ഈ കണക്കുകള് ചൂണ്ടിക്കാട്ടുന്നത് കോവിഡ് ബാധിച്ചു മരിച്ച ഇനിയും നിരവധി പേര് ആരോഗ്യ വകുപ്പിന്റെ പട്ടികയില് ഉള്പ്പെടാനുണ്ടെന്നതാണ്.
മെഡിക്കല് കോളജില് നിന്ന് കോവിഡ് ന്യൂമോണിയ എന്ന് കാരണം രേഖപ്പെടുത്തുന്ന മരണങ്ങള് പോലും ആരോഗ്യ വകുപ്പിന്റെ കണക്കില്പ്പെടുന്നില്ല. അര്ബുദം, വൃക്കരോഗങ്ങള്, ശ്വാസകോശ പ്രശ്നങ്ങള് തുടങ്ങി മറ്റ് രോഗങ്ങള് ബാധിച്ച കോവിഡ് രോഗികളുടെ മരണം സര്ക്കാര് കോവിഡ് കണക്കില് ഉള്പ്പെടുത്താത്തതും മരണ നിരക്ക് കുറയാന് കാരണമായി.
കോവിഡ് മൂലം ആരോഗ്യം മോശമാവുകയും പിന്നീട് കോവിഡ് നെഗറ്റിവായിട്ടും രോഗാവസ്ഥയില് നിന്ന് മുക്തി ലഭിക്കാതെ മരണത്തിന് കീഴടങ്ങുന്നവരും കോവിഡ് മരണക്കണക്കില് ഉള്പ്പെടുന്നില്ല. ഒരു മരണം കോവിഡ് മരണമായി പ്രഖ്യാപിക്കണമെങ്കില് മരണകാരണം കോവിഡായിരിക്കണമെന്നാണ് ആരോഗ്യ വകുപ്പ് അധികൃതര് പറയുന്നത്. മാത്രമല്ല രോഗി മരിക്കുമ്പോള് കോവിഡ് പോസിറ്റിവായിരിക്കണം. കൂടാതെ ആശുപത്രിയില് പ്രവേശിപ്പിച്ച അന്നു മുതല് മരിച്ചതു വരെയുള്ള മുഴുവന് ആരോഗ്യ റിപ്പോര്ട്ടും സമര്പ്പിക്കണം. ഇത് പരിശോധിച്ച ശേഷം മാത്രമേ കോവിഡ് മരണമായി പ്രഖ്യാപിക്കുകയുള്ളൂവെന്ന് അധികൃതര് വ്യക്തമാക്കി.