കൊച്ചി : സംസ്ഥാനത്ത് കൊവിഡ് വാക്സിൻ വിതരണത്തിലുള്ള ആശങ്കകൾ പരിഹരിക്കണമെന്നാവശ്യപ്പെട്ടുള്ള ഹർജി ഹൈക്കോടതി ഇന്ന് പരിഗണിക്കും. ഒറ്റപ്പാലം സ്വദേശിയാണ് ഹർജി നല്‍കിയത്. കേസ് തീർപ്പാക്കുംവരെ പൊതുവിപണിയിലെ വാക്സീൻ വിൽപ്പന നിർത്തിവെക്കാൻ നിർദ്ദേശം നൽകണമെന്നും ഹർജിയിൽ ആവശ്യപ്പെടുന്നുണ്ട്. വാക്സീൻ വിതരണത്തിൽ സുതാര്യത ആവശ്യമാണെന്ന് നേരത്തെ കോടതി വ്യക്തമാക്കിയിരുന്നു.
വാക്സീൻ സ്റ്റോക്ക് സംബന്ധിച്ച വിശദാംശങ്ങൾ കൊവിഡ് ജാഗ്രതാ പോർട്ടലിൽ ഉൾപ്പെടുത്തുന്നതടക്കമുള്ള വിഷയങ്ങളിൽ സർക്കാരിനോട് ഇന്ന് നിലപാട് അറിയിക്കാൻ കോടതി നിർദ്ദേശം നൽകിയിട്ടുണ്ട്. സംസ്ഥാന സർക്കാരിന്റെ കൊവിഡ് ഡാഷ്ബോർഡിലെ കണക്കനുസരിച്ച് കേരളത്തിൽ ഇത് വരെ 62,27,358 പേർക്കാണ് കൊവിഡ് വാക്സീൻ ആദ്യ ഡോസ് നൽകിയത്. 19,27,845 പേർക്ക് രണ്ടാം ഡോസും നൽകി. ഇത് വരെ 81,55,203 ഡോസ് വാക്സിനേഷനാണ് കേരളത്തിൽ നടന്നത്.
