കോന്നി : രണ്ടു പേരുടെ മരണത്തിന് ഇടയാക്കിയ കോന്നി ചെങ്കളം പാറമട ഉടമകള് റോഡു കയ്യേറി അനധികൃതമായി സ്ഥാപിച്ച ഗെയിറ്റ് സി പി ഐ എം പ്രവര്ത്തകര് നീക്കം ചെയ്തു. വര്ഷങ്ങളായി ഈ ഗെയിറ്റ് സ്ഥാപിച്ചിട്ട്. നാട്ടുകാര് നിരവധി പരാതികള് അധികാരികള്ക്ക് നല്കിയിട്ടും നടപടി സ്വീകരിച്ചില്ല.
തങ്ങളുടെ സ്ഥലത്ത് ആണ് ഗെയിറ്റ് സ്ഥാപിച്ചത് എന്ന് ഉടമകളും പൊതു ജനം നടക്കുന്ന വഴിയിലാണ് ഗെയിറ്റ് എന്നും നാട്ടുകാരും പറയുന്നു. പാറമടയുടെ പ്രവര്ത്തനം സംബന്ധിച്ച് സമഗ്ര അന്വേഷണം വേണം എന്ന് രേഖാമൂലം നല്കിയ പരാതികള് ഒന്നും തന്നെ കൃത്യമായ നടപടി ക്രമങ്ങളിലേക്ക് വന്നില്ല.
രണ്ടു പേരുടെ മരണത്തിനു ഇടയാക്കിയ പാറമട ദുരന്തം നടന്നിട്ട് പത്തു ദിവസം കഴിഞ്ഞിട്ടും കര്ശനമായ ഒരു നടപടിയും ഉണ്ടായില്ല. പാറമടയുടെ പ്രവര്ത്തനം നിര്ത്തണം എന്ന് നാട്ടുകാര് ഒന്നടങ്കം ആവശ്യം ഉന്നയിച്ചു. ജില്ലാ കലക്ടര് താല്ക്കാലിക നിരോധനം ഏര്പ്പെടുത്തി എങ്കിലും കഴിഞ്ഞ ദിവസം പാറമടയില് നിന്നും പാറ പൊട്ടിക്കുന്ന വെടി ശബ്ദം കേട്ടതായി നാട്ടുകാര് പറയുന്നു. റോഡു കയ്യേറി സ്ഥാപിച്ച ഗെയിറ്റ് പൊളിക്കണം എന്ന് ആവശ്യം ഉന്നയിച്ചു. സി പി എം പ്രവര്ത്തകര് രാവിലെ തന്നെ സ്ഥലത്ത് സമരം ആരംഭിച്ചിരുന്നു. കോന്നി പഞ്ചായത്ത് നേരിട്ട് പൊളിച്ചു നീക്കണം എന്നായിരുന്നു ആവശ്യം. സമരത്തിന് ഇടയില് സി പി എം പ്രവര്ത്തകര് തന്നെ ഗെയിറ്റ് പൊളിച്ചു നീക്കി ജനങ്ങള്ക്ക് സഞ്ചരിക്കാന് ഉള്ള വഴി തുറന്നു നല്കി.
