തിരുവനന്തപുരം : സ്വര്ണക്കടത്തു കേസില് പ്രതിരോധത്തിലായ ഇടതുമുന്നണി കേന്ദ്ര സര്ക്കാരിനെതിരെ പ്രത്യക്ഷ സമരത്തിലേക്ക് ഇറങ്ങുന്നു. കേന്ദ്ര അന്വേഷണ ഏജന്സികള്ക്കെതിരെ ഇടതുമുന്നണി പ്രഖ്യാപിച്ച പ്രതിരോധ സമരം നാളെ സംസ്ഥാനത്തെ എല്ലാ ബൂത്തുകളിലും നടക്കും. നാളത്തെ സമരത്തില് മന്ത്രിമാര് പങ്കെടുക്കില്ല.
കേന്ദ്രഏജന്സികളെ ഉപയോഗിച്ച് കേരളത്തിന്റെ അഭിമാന വികസന പദ്ധതികളെ അട്ടിമറിക്കാനുള്ള നീക്കം എന്നാരോപിച്ചാണ് നാളെ ഇടതു മുന്നണി ജനകീയ പ്രതിരോധം തീര്ക്കുന്നത്. സര്ക്കാര് പദ്ധതികളെ കുറിച്ചുള്ള ആരോപണങ്ങള് സത്യവിരുദ്ധമാണെന്ന് വ്യക്തമായിട്ടും കോണ്ഗ്രസും ബി.ജെ.പിയും ഒത്തുചേര്ന്ന് നിരന്തരം പ്രചരണം അഴിച്ചുവിടുകയാണന്നാണ് ഇടതു മുന്നണി വിമര്ശനം.
ഇ.ഡി അടക്കമുള്ള ഏജന്സികള് രാഷ്ട്രീയ ലക്ഷ്യത്തോടെ ഇതിന് കൂട്ടുനില്ക്കുകയാണ്. ഇതിനെ തുടര്ന്നാണ് സിഎജിക്കെതിരെയും ധനമന്ത്രി തോമസ് ഐസക് രംഗത്ത് വന്നത്. മന്ത്രിമാരെ ഉള്പ്പെടെ സമരത്തിന് ഇറക്കാന് തീരുമാനിച്ചെങ്കിലും പിന്നീട് അതു വേണ്ടെന്ന് തീരുമാനിക്കുകയായിരുന്നു. ബൂത്തുകളില് നടക്കുന്ന പ്രതിരോധത്തില് 25 ലക്ഷം പേര് അണിനിരക്കും.
