കൊച്ചി : പുരാവസ്തു – സാമ്പത്തിക തട്ടിപ്പ് കേസില്‍ അറസ്റ്റിലായ മോന്‍സന്‍ മാവുങ്കലുമായി ബന്ധം പുലര്‍ത്തിയിരുന്ന മാധ്യമപ്രവര്‍ത്തകന്‍ സഹിന് ആന്റണിയെ ചോദ്യം ചെയ്തു. ക്രൈംബ്രാഞ്ച് ഓഫീസില്‍ വിളിച്ചു വരുത്തിയാണ് ചോദ്യം ചെയ്തത്. മോന്‍സനുമായുള്ള ബന്ധത്തെക്കുറിച്ച്‌ ക്രൈംബ്രാഞ്ച് സഹിന് ആന്റണിയോട് വിശദീകരണം തേടി.
സഹിന് മോന്‍സണുമായി ബന്ധമുണ്ടെന്ന് പരാതിക്കാര്‍ ആരോപിച്ചിരുന്നു.ഇതിന്റെ അടിസ്ഥാനത്തിലാണ് ക്രൈംബ്രാഞ്ച് ചോദ്യം ചെയ്തത്. ശബരിമലയ്ക്കെതിരെ മോന്‍സന്‍ മാവുങ്കലിന്റെ വ്യാജരേഖ ഉപയോഗിച്ച്‌ വാര്‍ത്ത നല്‍കിയെന്ന് സഹിനെതിരായ ആരോപണം ഉയര്‍ന്നിരുന്നു. വ്യാജ രേഖ പ്രചരിപ്പിച്ച്‌ ഹിന്ദു സമൂഹത്തില്‍ ജാതീയമായ ഭിന്നിപ്പും സ്പര്‍ദ്ധയും സൃഷ്ടിക്കാനും ശബരിമല വിശ്വാസികളുടെ ഐക്യം തകര്‍ക്കാനും ശ്രമിച്ചെന്ന് കാട്ടി നിരവധി പരാതികള്‍ ഉയര്‍ന്നിരുന്നു.
മോന്‍സന്‍ മാവുങ്കലിന്റെ കൈവശമുള്ള ശബരിമലയിലെ ‘ ചെമ്പോല തീട്ടൂരം ‘ എന്ന പേരിലാണ് സഹിന് ആന്റണി ജോലി ചെയ്തിരുന്ന 24 ന്യൂസ് അടക്കമുള്ള മാധ്യമങ്ങള്‍ വാര്‍ത്ത നല്‍കിയത്. ശബരിമലയുടെ 351 മലയാളവര്‍ഷം പഴക്കമുള്ള രാജമുദ്രയുള്ള രേഖയാണ് മോന്‍സന്റെ കൈയിലുള്ളതെന്നാണ് വാര്‍ത്തയില്‍ പറഞ്ഞിരുന്നത്.
