ന്യൂഡൽഹി: കെപിസിസി അധ്യക്ഷ ചർച്ചയിൽ ഡൽഹിയിൽ നിർണായക കൂടിക്കാഴ്ച. എഐസിസി ജനറൽ സെക്രട്ടറി കെ.സി വേണുഗോപാലുമായി മുഖ്യമന്ത്രി വി.ഡി സതീശൻ കൂടിക്കാഴ്ച നടത്തുന്നു. ഡൽഹിയിലെ കെ.സി വേണുഗോപാൽ എംപിയുടെ വസതിയിയിലാണ് കൂടിക്കാഴ്ച. രമേശ് ചെന്നിത്തല ഉൾപ്പെടെയുള്ള മറ്റ് പ്രധാന നേതാക്കളും ഡൽഹിയിലുണ്ട്. സർക്കാരിന് യാതൊരു അലോസരവും ഉണ്ടാക്കാതെ സർക്കാരുമായി സഹകരിച്ചുപോകുന്ന ഒരാൾ കെപിസിസി അധ്യക്ഷനാകണമെന്നാണ് വി.ഡി സതീശന്റെ ആഗ്രഹം. എന്നാൽ ഔദ്യോഗികമായി ആരുടെയും പേര് മുന്നോട്ടുവെച്ചിട്ടില്ല.
അതേസമയം ജോസഫ് വാഴക്കന്റെ പേര് രമേശ് ചെന്നിത്തലയും കൊടിക്കുന്നിൽ സുരേഷിന്റെ പേര് വി.എം സുധീരനും നിർദേശിച്ചിട്ടുണ്ട്. അഴിച്ചുപണികൾക്കും പുനസംഘടനാ ചർച്ചകൾക്കും ഓണത്തിന് ശേഷം തുടക്കമാകുമെന്നാണ് നേരത്തെ നേതൃത്വം അറിയിച്ചിരുന്നത്. ഇതിനിടെയാണ് മുഖ്യമന്ത്രിയും കെ.സിയും തമ്മിൽ നിർണായക കൂടിക്കാഴ്ച നടക്കുന്നത്. അന്തിമ തീരുമാനത്തിലെത്താൻ ഹൈക്കമാൻഡിന് സാധിക്കാത്തതിനെ തുടർന്ന് ഓണം വരെ കാത്തിരിക്കാൻ തീരുമാനമെടുക്കുകയായിരുന്നു.
