ദമ്മാം: ഒരേ മുറിയില്‍ താമസിച്ചവര്‍ തമ്മിലുണ്ടായ വാക്ക് തര്‍ക്കത്തെ തുടര്‍ന്ന് മലയാളി കുത്തേറ്റ് മരിച്ചു. മറ്റൊരാളെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു. അല്‍ഖോബാറിലെ പ്രമുഖ റിക്രൂട്ട്മെന്റ് കമ്പനിയിലെ ജീവനക്കാരനായ തിരുവനന്തപുരം വിഴിഞ്ഞം സ്വദേശി സന്തോഷ് പീറ്റര്‍ (34) ആണ് മരിച്ചത്. തിരുവല്ല സ്വദേശി ജിജു പരിക്കുകളോടെ ആശുപത്രിയിലാണ്. ഇദ്ദേഹം അപകടനില തരണം ചെയ്തിട്ടുണ്ട്.
ഇരുവരേയും കുത്തിയ പ്രതി കൊല്ലം സ്വദേശി സക്കീറിനെ പോലീസ് പിടികൂടി. വ്യാഴാഴ്ച രാത്രി 9.30ഓടെ റാക്കയില്‍ തൊഴിലാളികള്‍ താമസിക്കുന്ന കെട്ടിടത്തിലായിരുന്നു സംഭവം. ഒരേ മുറിയിലെ താമസക്കാരായ സന്തോഷും പ്രതി സക്കീറും നിസാര കാരണങ്ങളുടെ പേരില്‍ തര്‍ക്കം ആരംഭിക്കുകയായിരുന്നു. വഴക്ക് മൂര്‍ഛിച്ചതോടെ പലപ്രാവശ്യം സുഹൃത്തുക്കള്‍ ഇടപെട്ട് ഇരുവരേയും പിടിച്ചുമാറ്റി.
എന്നാല്‍ വീണ്ടും തര്‍ക്കം നടക്കുകയും അരയില്‍ ഒളിപ്പിച്ചുവെച്ചിരുന്ന കത്തിയെടുത്ത് പ്രതി സന്തോഷിന്റെ നെഞ്ചില്‍ കുത്തുകയുമായിരുന്നെന്ന് പറയപ്പെടുന്നു. കുത്തേറ്റ് താഴെ വീണ സന്തോഷിനെ ആശുപത്രിയില്‍ എത്തിക്കാന്‍ ശ്രമിച്ചെങ്കിലും ജീവന്‍ രക്ഷിക്കാനായില്ല. തടയാന്‍ ശ്രമിച്ച ജിജുവിന് കാലിന്റെ തുടയിലാണ് കുത്തേറ്റത്. പ്രതി ഉടന്‍ വേഷം മാറി പുറത്തുപോവുകയായിരുന്നു.
സംഭവമറിഞ്ഞ് ഉടന്‍ സ്ഥലത്തെത്തിയ പോലീസ് പരിസരത്തെ കെട്ടിടങ്ങളിലടക്കം അന്വേഷണം നടത്തിയെങ്കിലും പ്രതിയെ കണ്ടെത്താനായിരുന്നില്ല. മൊബൈല്‍ ടവര്‍ കേന്ദ്രീകരിച്ച്‌ നടത്തിയ അന്വേഷണത്തില്‍ ബയോണി എന്ന സ്ഥലത്ത് എത്തിയ ഇയാള്‍ ടെലിഫോണ്‍ സ്വിച്ച്‌ ഓഫ് ചെയ് തതായി മനസിലാക്കി. വെള്ളിയാഴ്ച ഉച്ചകഴിഞ്ഞ് അല്‍ഖോബാറിലെ കോര്‍ണീഷില്‍ നിന്നാണ് പോലീസ് പ്രതിയെ പിടികൂടിയത്. പ്രതിയും കൊല്ലപ്പെട്ട സന്തോഷും നേരത്തെ സൗദിയില്‍ ജോലിചെയ്തവരാണെങ്കിലും നിലവിലെ കമ്പനിയില്‍ ഒരു വര്‍ഷം മുമ്പാണ് എത്തുന്നത്. ഇരുവരും ഡ്രൈവര്‍മാരാണ്.
