എറണാകുളം: അങ്കമാലിയില് ഓണാഘോഷ പരിപാടിക്കിടെ അപകടകരമായ രീതിയിൽ റോഡ് ഷോ നടത്തിയ വിദ്യാർഥികൾക്കെതിരെ നടപടിയുമായി മോട്ടോര് വാഹന വകുപ്പ്. തുറന്ന ലോറിയിൽ അപകടകരമായ രീതിയിൽ നൃത്തം ചെയ്ത സംഭവത്തിലാണ് നടപടി. ലോറി ഓടിച്ച ഫ്രിജോ, ലോനച്ചന് എന്നിവരുടെ ലൈസന്സ് മോട്ടോര് വാഹന വകുപ്പ് സസ്പെന്ഡ് ചെയ്തു. ഓണാഘോഷത്തോടനുബന്ധിച്ചഹസി ജില്ലയിലെ വിധ കോളേജുകളില് റോഡ് ഷോയും മോഡിഫൈ ചെയ്ത വാഹനങ്ങളുടെ അഭ്യാസ പ്രകടനങ്ങളും നടത്തുന്നുണ്ട്. ഇതുമായി ബന്ധപ്പെട്ട് നിരവധി പരാതികളാണ് മോട്ടോർ വാഹനവകുപ്പിന്റെ ലഭിക്കുന്നത്.
നിരവധി പരാതികൾ ലഭിച്ച സാഹചര്യത്തിൽ നടത്തിയ പരിശോധനയിലാണ് 4 കോളേജുകളിലെ വിദ്യാർഥികൾക്കെതിരെ എംവിഡി നടപടി എടുത്തിരിക്കുന്നത്. സമാനമായ നിയമലംഘനം കണ്ടെത്തിയ ആലുവയിലും മോട്ടോര് വാഹന വകുപ്പ് കേസെടുത്തിട്ടുണ്ട്. മൂവാറ്റുപുഴ കോളേജിലെ ദൃശ്യങ്ങളും എംവിഡി പരിശോധിക്കുകയാണ്. കൂടുതൽ വിദ്യാർഥികൾക്കെതിരെ നടപടി എടുത്തേക്കുമെന്നാണ് വിവരം.
