ഡല്ഹി : കൊറോണ ബാധിച്ച് ഗുജറാത്തിലും ജാര്ഖണ്ഡിലും തമിഴ്നാട്ടിലും ഓരോ മരണം കൂടി. ഡല്ഹിയില് ഡോക്ടര്മാര് ഉള്പ്പെടെ 42 ആരോഗ്യ പ്രവര്ത്തകര്ക്ക് കൊറോണ സ്ഥിരീകരിച്ചു. ഇതില് 20 മലയാളികളും ഉള്പ്പെടും. കൊറോണ വ്യാപിക്കുന്ന പശ്ചാത്തലത്തില് ഡല്ഹിയിലെ 33 പ്രദേശങ്ങള് അതീവ നിയന്ത്രണ മേഖലകളായി പ്രഖ്യാപിച്ചു.
ചെന്നൈയില് പുളിയന്തോപ്പ് സ്വദേശിയായ 54 വയസുള്ള സ്ത്രീ ആണ് മരിച്ചത്. ഇതോടെ ചെന്നൈയില് മരണം 11 ആയി. ഗുജറാത്തില് 75 വയസുള്ള രോഗിയാണ് മരിച്ചത്. ഇതോടെ മരണസംഖ്യ 23 ആയി. ഗുജറാത്തില് പുതിയ 25 കൊറോണ കേസുകള് റിപ്പോര്ട്ട് ചെയ്തതോടെ ആകെ രോഗികളുടെ എണ്ണം 493 ആയി. ജാര്ഖണ്ഡില് ഒരു മരണം റിപ്പോര്ട്ട് ചെയ്തത് റാഞ്ചി രാജേന്ദ്ര ഇന്സ്റ്റിട്ട്യൂട്ട് ഓഫ് മെഡിക്കല് സയന്സിലാണ്.
രാജ്യത്ത് 24 മണിക്കൂറിനിടെ 34 കൊറോണ മരണമാണ് റിപ്പോര്ട്ട് ചെയ്തത്. 273 പേര് ഇതുവരെ മരിച്ചു. 909 പേര്ക്ക് കൂടി രോഗം സ്ഥിരീകരിച്ചതായി ആരോഗ്യ മന്ത്രാലയം അറിയിച്ചു.