പത്തനംതിട്ട : സാധാരണക്കാരായ പ്രവാസികൾക്ക് യാതൊരു പ്രയോജനവും ചെയ്യാത്തതും പ്രവാസികളിലെ വരേണ്യ വർഗ്ഗത്തെ പ്രതിനിധീകരിക്കുന്നതുമായ പിണറായി സർക്കാർ രൂപീകരിച്ച ലോക കേരള സഭ പിരിച്ചുവിട്ട വി.ഡി.സതീശൻ സർക്കാർ നടപടി സ്വാഗതാർഹവും പ്രവാസി താല്പര്യങ്ങൾ സംരക്ഷിക്കുന്നതുമാണെന്ന് കേരളാ പ്രദേശ് പ്രവാസി കോൺഗ്രസ് ജില്ല പ്രവർത്തക യോഗം വിലയിരുത്തി. കോവിഡ് സാഹചര്യം, സ്വദേശിവത്ക്കരണം, ഊർജ്ജിത നിതാഖത്ത് എന്നിവ മൂലം ആയിരക്കണക്കിന് പ്രവാസികൾ തൊഴിൽ നഷ്ടപ്പെട്ട് മടങ്ങിയെത്തിയിട്ടും അവർക്ക് നിരുപാധിക പെൻഷൻ, തൊഴിൽ, പുന:രധിവാസ പദ്ധതികൾ എന്നിവ നടപ്പിലാക്കാതെ ലോക കേരള സഭകളുടെ പേരിൽ കോടിക്കണക്കിന് രൂപ മുൻ സർക്കാർ ധൂർത്തടിച്ചു.
ഇതിന്റെ നടത്തിപ്പിലെ അഴിമതിയും ധൂർത്തും അന്വേഷിച്ച് നടപടികൾ സ്വീകരിക്കണമെന്നും യോഗം സർക്കാരിനോട് ആവശ്യപ്പെട്ടു. നോർക്ക കെയർ ഇൻഷുറൻസ് പദ്ധതിയിൽ മടങ്ങിവന്ന പ്രവാസികളെക്കൂടി അംഗങ്ങളാക്കണമെന്നും ക്ഷേമനിധി അംഗത്വത്തിനുള്ള പ്രായപരിധി ഇപ്പോഴുള്ള 60 വയസ് എന്നത് 70 ആക്കി ഉയര്ത്തണമെന്നും പ്രവാസി കോൺഗ്രസ് യോഗം സംസ്ഥാന സർക്കാരിനോട് ആവശ്യപ്പെട്ടു. സംസ്ഥാന ജനറൽ സെക്രട്ടറി സാമുവൽ കിഴക്കുപുറം യോഗം ഉദ്ഘാടനം ചെയ്തു. ജില്ലാ പ്രസിഡന്റ് മാത്യു പാറക്കൽ അധ്യക്ഷത വഹിച്ചു. സംസ്ഥാന ഭാരവാഹികളായ മോനി ജോസഫ്, കോശി ജോർജ്ജ്, ഷിബു റാന്നി എന്നിവർ പ്രസംഗിച്ചു.
