ന്യൂഡല്‍ഹി: ഡല്‍ഹി ആരോഗ്യമന്ത്രി സത്യേന്ദ്ര ജെയിന് കോവിഡ് സ്ഥിരീകരിച്ചു. ശക്തമായ പനിയും ശ്വാസ തടസ്സത്തെയും തുടര്‍ന്നു സത്യേന്ദ്ര ജെയിനെ ചൊവ്വാഴ്ച രാജീവ് ഗാന്ധി സൂപ്പര്‍ സ്പെഷാലിറ്റി ആശുപത്രിയില്‍ പ്രവേശിപ്പിച്ചിരുന്നു. തുടര്‍ന്നാണ് അദ്ദേഹത്തിന്റെ സാമ്പിള്‍ പരിശോധിച്ചത്.
കഴിഞ്ഞ ദിവസം നടത്തിയ കോവിഡ് സാമ്പിള്‍ പരിശോധന ഫലം നെഗറ്റീവായിരുന്നു. എന്നാല്‍ പനി കുറയാത്ത സാഹചര്യത്തില്‍ വീണ്ടും സത്യേന്ദ്ര ജെയിന്റെ സാമ്പിള്‍ പരിശോധിക്കുകയായിരുന്നു. കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തില്‍ നടന്ന യോഗത്തില്‍ പങ്കെടുത്തതിനു തൊട്ടുപിന്നാലെ ആയിരുന്നു സത്യേന്ദ്ര ജെയിനു രോഗലക്ഷണങ്ങള്‍ കാണിച്ചത്. യോഗത്തില്‍ ഡല്‍ഹി മുഖ്യമന്ത്രി അരവിന്ദ് കേജരിവാളും സംബന്ധിച്ചിരുന്നു.
