ഡല്ഹി: തട്ടിപ്പുകാര്ക്ക് ബാങ്ക് അക്കൗണ്ട് വിറ്റ മലയാളി വിദ്യാര്ഥി ഡല്ഹിയില് പിടിയില്. 19 കാരനായ ഡല്ഹി സര്വകലാശാല വിദ്യാര്ത്ഥി കെ.കെ. ആദിലാണ് അറസ്റ്റിലായത്. കൂടെ താമസിക്കുന്ന മലയാളിയായ സുഹൃത്ത് മുഖേനയാണ് ആദില്, തട്ടിപ്പുകാരനായ മറ്റൊരു മലയാളിക്ക് ബാങ്ക് അക്കൗണ്ട് വിറ്റത്. ഇതിന് 30,000 രൂപ പ്രതിഫലമായി കൈപ്പറ്റിയതായി ആദില് പോലീസിനോട് പറഞ്ഞു. 10.35 ലക്ഷം രൂപ തട്ടിപ്പുസംഘം അടിച്ചുമാറ്റിയെന്ന ഒരു യുവതിയുടെ പരാതിയിലാണ് വിദ്യാര്ത്ഥി കുടുങ്ങിയത്.
ഉയര്ന്ന ലാഭവിഹിതം നല്കാമെന്ന വാഗ്ദാനം കേട്ടാണ് താന് 10.35 ലക്ഷം തട്ടിപ്പുസംഘത്തില് നിക്ഷേപിച്ചതെന്ന് യുവതി പരാതിയില് പറഞ്ഞു. തട്ടിപ്പുസംഘത്തിന്റെ വെബ്സൈറ്റില് അക്കൗണ്ട് ക്രിയേറ്റ് ചെയ്താണ് പണം നല്കിയത്. ടെലഗ്രാം, വാട്ട്സ്ആപ്പ് ഗ്രൂപ്പുകള് വഴിയാണ് ഇവരെ പരിചയപ്പെട്ടത്. നിക്ഷേപിച്ച തുക പിന്വലിക്കാനാകാത്ത സാഹചര്യത്തിലാണ് പരാതി നല്കിയതെന്നും യുവതി വ്യക്തമാക്കി.