ന്യൂഡല്‍ഹി : കോവിഡിന്റെ ഡെല്‍റ്റ വകഭേദം വാക്‌സീന്‍ എടുത്തവരിലും എടുക്കാത്തവരിലും ഉണ്ടാക്കുന്നത് സമാനമായ തോതിലുള്ള വൈറല്‍ ലോഡാണെന്ന് യുഎസ് സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍(സിഡിസി) നടത്തിയ പഠനത്തില്‍ കണ്ടെത്തി.
2021 ജൂലൈ 03 നും 17നും ഇടയില്‍ ബാണ്‍സ്റ്റേബിള്‍ കൗണ്ടിയിലേക്ക് വേനലവധി ചെലവഴിക്കാന്‍ യാത്ര ചെയ്ത മസാച്ചുസെറ്റ്‌സ് നിവാസികളില്‍ കണ്ടെത്തിയ 469 കോവിഡ് കേസുകളെ ആധാരമാക്കിയാണ് പഠനം നടത്തിയത്. ഇതില്‍ 346 പേരും (74 %) പൂര്‍ണമായും വാക്‌സീന്‍ എടുത്തവരായിരുന്നു. 133 രോഗികളില്‍ നിന്നെടുത്ത 90 ശതമാനം സാംപിളുകളിലും ഡെല്‍റ്റ വകഭേദം കണ്ടെത്തി.
വാക്‌സീന്‍ എടുത്തവരും അല്ലാത്തവരുമായ രോഗികളുടെ സാംപിള്‍ പരിശോധനയില്‍ സൈക്കിള്‍ ത്രെഷോള്‍ഡ് (സിടി) മൂല്യങ്ങള്‍ സമാനമായിരുന്നു. ആര്‍.ടി.പി.സി.ആര്‍ പരിശോധനയ്ക്കിടെ ഒരു സാംപിളില്‍ എത്ര വേഗം സാര്‍സ് കോവ് -2 വൈറസ് കണ്ടെത്താന്‍ സാധിക്കുമെന്നതിന്റെ അളവ് കോലാണ് സിടി വാല്യൂ. സാംപിളിലെ വൈറല്‍ ആര്‍എന്‍എ തിരിച്ചറിയാന്‍ കഴിയുന്ന തോതിലേക്ക് എത്താന്‍ വേണ്ടി അത് എത്ര ആവൃത്തി ആംപ്ലിഫൈ ചെയ്യപ്പെടണം എന്നതിന്റെ കണക്കാണ് ഇത്. ഇരു കൂട്ടരിലും സിടി മൂല്യം സമാനമായി വന്നത് വൈറല്‍ ലോഡ് സമാനമാണെന്ന സൂചന നല്‍കുന്നു.
ഉയര്‍ന്ന വൈറല്‍ ലോഡുള്ളവര്‍ മറ്റുള്ളവരിലേക്ക് രോഗം പരത്താനുള്ള സാധ്യതയും കൂടുതലാണ്. ഡെല്‍റ്റ ബാധിതരായ വാക്‌സീന്‍ എടുത്ത വ്യക്തികള്‍ക്ക് മറ്റ് വകഭേദങ്ങളില്‍ നിന്ന് വ്യത്യസ്തമായി കോവിഡ് പരത്താനാകുമെന്ന് പഠനത്തിന്റെ വെളിച്ചത്തില്‍ സിഡിസി ഡയറക്ടര്‍ റോഷല്‍ വാലന്‍സ്‌കി ചൂണ്ടിക്കാട്ടി.
ഈ പഠനത്തിലെ കണ്ടെത്തലുകളാണ് മാസ്‌ക് ഉപയോഗത്തെ സംബന്ധിച്ച മാര്‍ഗനിര്‍ദ്ദേശം പുതുക്കാന്‍ സിഡിസിയെ പ്രേരിപ്പിച്ചത്. വാക്‌സീന്‍ എടുത്തവര്‍ക്ക് പൊതുസ്ഥലങ്ങളില്‍ മാസ്‌ക് വേണ്ട എന്ന് ആദ്യം നിര്‍ദ്ദേശിച്ച സിഡിസി പിന്നീട് സ്‌കൂളുകളിലും ഓഫീസ് പോലുള്ള പൊതു അകത്തളങ്ങളിലും എല്ലാവരും മാസ്‌ക് തുടരണമെന്ന് ശുപാര്‍ശ ചെയ്യുകയായിരുന്നു.
