കൊച്ചി : നടിയെ ആക്രമിച്ച കേസിന്റെ തുടരന്വേഷണത്തിന് കൂടുതല് സമയം അനുവദിക്കണമെന്ന അന്വേഷണ സംഘത്തിന്റെ ഹര്ജി ജസ്റ്റിസ് കൌസര് എടപ്പകത്ത് പരിഗണിക്കരുതെന്ന അതിജീവിതയുടെ ആവശ്യം ഹൈക്കോടതി അനുവദിച്ചില്ല. തുടക്കം മുതലേ കേസ് പരിഗണിക്കുന്ന ബഞ്ചില് നിന്ന് ഹര്ജി ഈ ഘട്ടത്തില് മാറ്റാന് കഴിയില്ലെന്ന് കോടതി വ്യക്തമാക്കി. കേസന്വേഷണം അട്ടിമറിക്കാന് നീക്കം നടക്കുന്നുവെന്നാരോപിച്ച് അതിജീവിത നല്കിയ ഹര്ജി വെള്ളിയാഴ്ച പരിഗണിക്കും.
നടിയെ ആക്രമിക്കുന്ന ദ്യശ്യങ്ങള് കയ്യിലുണ്ടെന്ന ആരോപണം തെറ്റെന്ന് ദിലീപ്. അന്വേഷണത്തിന് കൂടുതല് സമയം അനുവദിക്കരുതെന്ന് ദിലീപിന്റെ അഭിഭാഷകന് കോടതിയില് ആവശ്യപ്പെട്ടു. ഡിജിറ്റല് തെളിവുകളുടെ പരിശോധന ഫലം മൂന്ന് മാസം മുമ്പ് ക്രൈബ്രാഞ്ചിന് ലഭിച്ചതാണ്. അത് ഇതുവരെയും പരിശോധിച്ചില്ലെന്നാണ് ക്രൈബ്രാഞ്ച് പറയുന്നത്. ഫോണുകള് പിടിച്ചെടുക്കേണ്ട ആവശ്യമില്ലെന്നും വിവരങ്ങള് മുഴുവനായും മുബൈയിലെ ലാബില് നിന്നും ലഭിച്ചതാണെന്നും ദിലീപ് കോടതിയെ അറിയിച്ചു.
