കൊച്ചി : തിയേറ്ററുകൾ തുറക്കണമെന്ന ആവശ്യത്തിൽനിന്നു വിതരണക്കാരുടെ സംഘടന പിന്നോട്ട് പോയി എന്ന പ്രചരണം വ്യാജമാണെന്ന് ഫിലിം ഡിസ്ട്രിബ്യൂട്ടേഴ്സ് അസോസിയേഷൻ പ്രസിഡന്റും നിർമാതാവുമായ സിയാദ് കോക്കർ. തിയേറ്ററുകൾ എത്രയും വേഗം തുറക്കണമെന്ന് തന്നെയാണ് തങ്ങളുടെ സംഘടനയുടെ നിലപാടെന്നും സർക്കാറിനോട് അതെക്കുറിച്ച് സംസാരിച്ചിട്ടുണ്ടെന്നും സിയാദ് കോക്കർ പറഞ്ഞു. ചില മാധ്യമങ്ങളിൽ വിതരണക്കാർ ആവശ്യത്തിൽ നിന്ന് പിന്നോട്ട് പോയെന്ന തരത്തിൽ വാർത്ത വന്നിരുന്നു.
സംഘടനയുടെ എക്സിക്യൂട്ടീവ് കമ്മിറ്റി യോഗം നടക്കാൻ പോകുന്നതേയുള്ളൂ. തീരുമാനങ്ങൾ ആയിട്ടില്ല. പിന്നെങ്ങിനെയാണ് ഞങ്ങൾ പിൻമാറിയെന്ന വാർത്ത പ്രചരിക്കുന്നത്. തിയേറ്ററുകൾ എത്രയും പെട്ടന്ന് തന്നെ തുറക്കണമെന്ന് തന്നെയാണ് ഞങ്ങളുടെയും ആഗ്രഹം. സർക്കാർ പറയുന്ന എല്ലാ കോവിഡ് മാനദണ്ഡങ്ങളും പാലിച്ച് പ്രവർത്തിപ്പിക്കാം. ആയിരക്കണക്കിന് കുടുംബങ്ങളാണ് ഈ മേഖലയെ ആശ്രയിച്ച് ജീവിക്കുന്നത് – സിയാദ് കോക്കർ പറഞ്ഞു.
