പത്തനംതിട്ട : ഭാരതത്തിന്റെ 75-ാമത് സ്വാതന്ത്ര്യദിനാഘോഷം ഓഗസ്റ്റ് 15ന് പത്തനംതിട്ട ജില്ലാ സ്റ്റേഡിയത്തില്‍ നടക്കും. മുഖ്യാതിഥിയായ ആരോഗ്യ മന്ത്രി വീണാ ജോര്‍ജ് രാവിലെ ഒന്‍പതിന് ദേശീയ പതാക ഉയര്‍ത്തി പരേഡ് അഭിവാദ്യം സ്വീകരിക്കും. ആഘോഷത്തിന് മുന്നോടിയായുള്ള സേനകളുടെ പരിശീലനത്തിന് പത്തനംതിട്ട ജില്ലാ സ്റ്റേഡിയത്തില്‍ തുടക്കം കുറിച്ചു. ജില്ലാ കളക്ടര്‍ ഡോ.ദിവ്യ എസ് അയ്യര്‍ പരേഡ് ഗ്രൗണ്ട് സന്ദര്‍ശിച്ചു.
ജില്ലാ പോലീസ് മേധാവി ആര്‍.നിശാന്തിനിയുടെ മേല്‍നോട്ടത്തില്‍ ഫോറസ്റ്റ്, എക്‌സൈസ്, റിസര്‍വ് പോലീസ്, പോലീസ്, പോലീസ് വനിത, എന്നി വിഭാഗം പ്ലാറ്റൂണുകളുടെ പരിശീലനമാണ് നടന്നത്. അസി.കമാന്‍ഡന്റ് പി.പി സന്തോഷ്‌കുമാറാണ് പരിശീലനത്തിന് നേതൃത്വം നല്‍കുന്നത്.
ഇത്തവണ കോവിഡിന്റെ പശ്ചാത്തലത്തില്‍ ആഘോഷ പരിപാടികളിൽ ക്ഷണിതാക്കളുടെ പരമാവധി എണ്ണം 100 ആയിരിക്കും. പരിപാടിയില്‍ പങ്കെടുക്കുന്നവര്‍ കൈകള്‍ അണുവിമുക്തമാക്കുകയും, തെര്‍മല്‍ സ്‌കാനിംഗിനു വിധേയകമാകുകയും ചെയ്യണം.
