കോട്ടയം : രാത്രി കര്ഫ്യൂ പ്രഖ്യാപിച്ചിട്ടുണ്ടെങ്കിലും പുതുവത്സരാഘോഷങ്ങള് നടക്കുന്ന സ്ഥലങ്ങളില് കര്ശന നിരീക്ഷണവുമായി പോലീസ്. പുതുവത്സരാഘോഷങ്ങള്ക്കു വന്തോതില് ലഹരി ഉപയോഗിക്കാന് സാധ്യതയുണ്ടെന്ന ഇന്റലിജന്സ് മുന്നറിയിപ്പിന്റെ അടിസ്ഥാനത്തിലാണ് പോലീസ് നടപടികളുമായി രംഗത്തെത്തിയിരിക്കുന്നത്. വിട്ടുവീഴ്ചയില്ലാത്ത നടപടി സ്വീകരിക്കാന് ജില്ലാ പോലീസ് ചീഫുമാര്ക്ക് ഡിജിപി നിര്ദേശം നല്കി.
രാത്രി 10നു ശേഷം ഡിജെ പാര്ട്ടികള് നടത്താന് പാടില്ലെന്നാണ് പോലീസ് അറിയിച്ചിരിക്കുന്നത്. ഡിജെ പാര്ട്ടികള് വിവരം മുന്കൂട്ടി അതതു പോലീസ് സ്റ്റേഷനുകളില് അറിയിക്കണം. ഇതോടെ പാര്ട്ടികള് നടക്കുന്ന ഹോട്ടലുകള് സ്പെഷല് ബ്രാഞ്ച് നിരീക്ഷിക്കും. ഇതിനു പുറമേ ഡിജെ പാര്ട്ടികള് സംഘടിപ്പിക്കുന്ന ഹോട്ടലുകളില് സിസിടിവി കാമറകള് കൃത്യമായി പ്രവര്ത്തിപ്പിക്കണമെന്നും ഈ കാമറകളിലെ ദൃശ്യങ്ങള് സൂക്ഷിച്ചുവെയ്ക്കണമെന്നും പോലീസ് നിര്ദേശിച്ചിട്ടുണ്ട്. ഡിജെ പാര്ട്ടികള് സംഘടിപ്പിക്കുന്ന ഹോട്ടലുകാര്ക്ക് ഇതുസംബന്ധിച്ച നോട്ടീസും പോലീസ് നല്കും.
ലഹരിമരുന്ന് ഉപയോഗം വ്യാപകമായതിന്റെ പശ്ചാത്തലത്തിലാണ് ഡിജെ പാര്ട്ടികള്ക്കു നിയന്ത്രണം ഏര്പ്പെടുത്താന് പോലീസ് തീരുമാനിച്ചിരിക്കുന്നത്. പുതുവത്സരാഘോഷങ്ങളുടെ ഭാഗമായി പലയിടങ്ങളിലും ഡിജെ പാര്ട്ടികള് സംഘടിപ്പിക്കാറുണ്ട്. ഈ പാര്ട്ടികളിലൊന്നും ലഹരിമരുന്ന് ഉപയോഗവും അനിഷ്ട സംഭവങ്ങളും ഉണ്ടാകാതിരിക്കാനാണ് പോലീസ് ശ്രമിക്കുന്നത്.
അടുത്തയിടെ വിവിധ സ്ഥലങ്ങളില് നടന്ന ആക്രമണങ്ങള്ക്കു പിന്നില് ലഹരിമരുന്ന് ഉപയോഗമാണെന്ന വാര്ത്തകളും പുറത്തുവന്നിരുന്നു. ഈ സാഹചര്യത്തിലാണ് ലഹരി ഒഴുകാന് സാധ്യതയുള്ള ഡിജെ പാര്ട്ടികള്ക്കു പോലീസ് നിയന്ത്രണം ഏര്പ്പെടുത്തുന്നത്. സാധാരണ പുതുവത്സരാഘോഷം നടക്കാറുള്ള റിസോര്ട്ടുകളും ഹോം സ്റ്റേകളും ഹോട്ടലുകളും ദിവസങ്ങളായി സ്പെഷല് ബ്രാഞ്ചിന്റെ നിരീക്ഷണത്തിലാണ്. ഡിജെ പാര്ട്ടികളിലും പോലീസിന്റെ സാന്നിധ്യം ഉണ്ടാകുമെന്നാണ് സൂചന.